Vawiin khan Sports Minister Pu Zodintluanga’n Zemabawk North ah Mizoram Judo Hall a hawng. Judo Hall hawnna inkhawmah hian Mizoram Legislative Assembly Deputy Speaker Pu R.Lalrinawma leh Parliamentary Secretary Pu Hmingdailova Khiangte te pawh an tel a ni.
Khuallian Pu Zodintluanga chuan Mizoram Judo Hall hawn a ni ta chu lawmawm tiin thalaite mamawh hretu sawrkar kan neih avangin Mizo thalaite kan vannei hle a ni, a ti. Sawrkar hmalakna hrang hrang sawi langin tun hnaia Taekwondo Hall hawn tak te, hmarchhak a indoor stadium lian ber nia ngaih R.Dengthuama Indoor Stadium hawn tak te bakah Aizawl leh a chhehvela hall engemawzat hawn mai hmabak te; Serchhipa Hall pathum hawn tura buatsaih mek te; Champhai, Lunglei leh Kolasib a Stadium puitling sak mek te; Sazaikawna Contact Sports Centre sak mek te; Bungtlang leh Keituma Hall hawn mai hmabak a peihfel tawh te a tarlang a. Hei bakah hian North Eastern Council (NEC) chuan Sports Directorate building, Vaivakawn Sports Infrastructure bakah Saitual leh Hnahthiala phullem phahna tur project a pawm tawh thu a sawi bawk. Sports Minister chuan thalaite tuihalna hriain infiamna lama hmasawnna ruhrel din kawngah sawrkar chuan theihtawp a chhuah a, Mizoram hmun hrang hrangah hall leh field thar infiammite hman tura a hlui mek lai hian Mizo thalaiten tih ve tur an neih chu khawvel ngamtu thinlung pua rilru leh taksaa intuaithar a ni, a ti a. Infrastructure an neih te hmang tangkaiin infiammiten ram chhung leh ram pawn dai dar a, Mizoram leh India ram tihmangthatu nih tum turin Pu Zodintluanga chuan Mizo thalaite a fuih a ni.
Khual zahawm Deputy Speaker Pu R.Lalrinawma, Aizawl East-I bialtu MLA ni bawk pawhin thu sawiin Mizoram Judo Hall hawn tak chu a bial mipuite leh Mizoram tana thil chhinchhiahtlak, Judo lama tui mi te tana mel lung pawimawh tak an phun belhna ni a ni, a ti. Sawrkarin infiammite tana hna a thawh nasat avangin mipui an phur a, India ram chhung leh ram pawn atanga medal rawn hawn an pung a, football-ah phei chuan India rama club thaah Mizo tlangval tel lohna club a awm tawh lo, a ti a. A bial chhunga sawrkar hmalakna leh hmachhawp a sawi lan zingah Sihphira Indoor Stadium changtlung tak sak a nih tur thu te leh field siam a nih tur thu te, Zemabawk a Basketball court siam mek pawh a hmawr bawk hnaih a ni tawh thu a sawi a.. Sports Association hrang hrang leh sawrkar thawhhona tha tak avang leh Mizo thalaite thahnemngaihna avangin Sports in hma a sawn zel chu lawmawm tiin hei aia sang thleng thei an nih hriaa hmasawn zel turin Deputy Speaker chuan infiammite a chah a ni.
Mizoram State Sports Council Secretary Pu C.Laltlanthanga report-a a lan danin Mizoram Judo Hall hawn tak hi July ni 21, 2014 khan sak tan niin February ni 16, 2016 ah zawh vel a ni a. Cheng nuai 150 senga sak niin sum hi Mizoram SPA 2013-2014 atanga hmuh a ni. Judo Hall hi Govt. Zemabawk Primary School-I ramah sak a ni a. A building hian chhawng thum neiin Ground Floor chu Primay School atana ruahman a ni. Mizo chhiara chhawng hnihna hi Judo Hall atana hman niin square metre 260 a zau a ni a, inthlakna pindan pakhat leh inthiarna pindan pathum a awm bawk.
Mizoram Judo Hall hawnna inkhawm hi Sports Secretary Pu HL.Rochungnunga’n a kaihruai a, Mizoram Judo Association President Pu R.Vanlalduata’n thu sawiin Sports Dept. Jt.Director Pu J.Vansangzuala’n lawmthu sawiin hun a khar a ni.
