3875/2023-2024

Aizawl, the 17th February, 2024: Ministry of Youth Affairs and Sports, Sports Authority of India (SAI), Association of Indian Universities, Indian Olympic Association leh National Sports Federation-te tangkawp buatsaih Khelo India University Games (KIUG) 2023 hnuaia mipa football inelna chu vawiin chawhma dar 10:00 khan Rajiv Gandhi Stadium, Mualpui-ah tan a ni. Chawhma dar 9:30 khan Executive Committee (Mizoram) for Khelo India University Games buatsaihin a hawnna inkhawm tawi neih a ni a, Sports & Youth Services (SYS) Minister Pu Lalnghinglova Hmar, Chairman, Executive Committee (Mizoram) for Khelo India University Games chuan khuallian ni a hmanpuiin a hawng a ni.

Sports & Youth Services Minister Pu Lalnghinglova Hmar chuan Khelo India University Games hnuaia infiamna discipline hrang hrang zingah Mizoramin mipa football inelna a thleng chu lawmawm a tih thu sawiin, a buaipuitu leh mawhphurhna hrang hrang neite inpekna fakawm a ti a. India ram kil hrang hrang atanga footballer leh anmahni tawiawma Mizoram rawn pantute thinlung taka Mizoramin a lo lawm thu sawiin, State mawi leh sik leh sa nuam tak, fai leh boruak muanawm takah hian kan lo lawm che u a, hun nuam tak hmang turin duhsakna kan hlan che u a, a tha lam zawnga Mizoram in hriat reng pawh kan beisei a ni, a ti a. Aizawla mipa football inelna chu tun Khelo India University Games kal mekah hian a hlawhtling ber a nih a beisei thu a sawi a. Team pariat inel turte chu state pali atang chauha lokal an ni tih sawiin, hei hian football inelna chu inelna dang ang ngawt a nih lohzia a lantir tih a sawi bawk.

Sports Minister chuan sawi chhunzawmin, India rama Traditional Football Power House tia hriat hlawh Kerela, Punjab, W. Bengal leh Maharashtra atanga University Football team an rawn tel thei chu lawmawm a tih thu sawiin, football hmangin infiamna mawi lantir mai bakah inunauna tha siam a nih ngei a beisei thu a sawi a. Football chu infiamna chauh ni lo, eizawn nana thalai tam takte'n an hman tawh thu sawiin, India footballer-te'n hlawh tha tak tak an nei tawh a ni, a ti a. University zirlai footballer kalkhawmte chu lehkha thiamna mai bakah football thiamna hmanga national mai nilo international level thlenga hlawhtlinna chang thei tura theihtawp chhuah turin a fuih nghal bawk.

Khelo India University Games 2023 mipa football inelna hawnna hun hi Pu Lalramsanga Sailo, Secretary, Sports & Youth Services Department chuan kaihruaiin inlawmna thu a sawi a. Pu Lalrengpuia, Competition Manager hnen atangin report ngaihthlak a ni.

Khelo India University Games hi India rama University level inelna sang ber niin, kumin hian North East India-a state 7 te'n an inthlen tawm a, Assam chu main host niin, sports discipline hrang hrang 15 a thleng dawn a. State dang zawngin sports discipline 1 theuh an thleng thung dawn a, Manipur erawh an ram a buai avangin an thleng dawn lo a ni. Infiamna discipline hrang hrang hmangin intihsiakna neih a ni dawn a, February ni 19 atanga 29, 2024 chhung a awh ang.

Khelo India University Games 2023 mipa football inelna bik atan hian Team 8 te qualify-in, Group hnihah then an ni a. League cum Knock Out system-a khelh tur niin, group atanga a sang pahnihin semi final an khel ang a, a chak zawk te'n February ni 27, 2024 ah final an khel ang. Khelo India University Games-a telte hi Association of Indian Universities (AIU) intihsiaknaa Football-a ti tha pariatte an ni.

Group A: Punjabi University, Patiala; Guru Nanak Dev University, Amritsar; University of Calicut, Kerala leh University of Calcutta

Group B: Mahatma Gandhi University, Kottayam; Adamas University, Shivaji University leh University of Kerala

Khelo India University Games 2023 mipa football inelna bik kaihhnawihah hian Infiammi 176, Supporting staff 25, Technical official (AIFF) 23, General official 50, Sports Specific Volunteer 18, MYAS & SAI Official-te bakah Nodal Department SYS kaihhruai Line Department hrang hrang telna Local Organising Committee member engemawzat an awm a ni.