94/2023-2024

Vawiin khan Sports Minister Pu Robert Romawia Royte chuan Mamit Residential Sports School sak mek chu a hmunah chipchiar taka fangin a enfiah.

He Sports School hi PMJVK Scheme atanga sum hmuh cheng nuai 3400 chuang senna tur niin Academic building 1, Hostel building 2, Staff Quarters 1, Principal Quarters 1, Multipurpose Hall 1, Basket ball Court 1, Volleyball Court 1, Tanky lian bakah Astroturf Football Ground leh Pavillion te a keng tel a ni. Engineer te report danin sum hi Central sorkarin 50% a rawn release tawh a, a taka hnathawh tawh chin hi 80% vel a ni thung.

Vawiin vek hian cheng nuai 1250 senna tur Mamit Multipurpose Indoor Hall sak mek pawh Sports Minister Pu Robert Romawia Royte hian a tlawh a, Mizorama Hall lian ber dawttu tur Mamit-in a nei tur chu a lawmpui hle tih a sawi. Sports Minister chuan Mamit District Sports Complex, Bawngva hmuna cheng nuai 4400 chuang senga sak mek pawh a tlawh a. Athletic Tract, Hostel, Pavillion sak mek a en a. Mamit sports complex hian Tennis Courts 2, Basketball Court, Futsal Ground leh Volleyball Court te a keng tel a ni.

Sports Minister hi MLA Pu K.Laldawngliana, SEDP Board Vice Chairman, Pu TC Pachhunga, SYS Secretary Dr Lalrozama IAS ten an tawiawm a ni.