No.2269/2021-2022

Aizawl, 17th September, 2021 : New Delhi-a cham mek Sports Minister Pu Robert Romawia Royte chuan nimin September ni 16, 2021 leh vawiin khan Rural Electrification Corporation(REC) Chairman & MD Sanjay Malhotra IAS chu kawmin Tuirial hmuna Motor Sports leh a kaihhnawih project te a sawipui. 

He motor sports project hi India leh hmarchhak pum huap pawha thalaite mamawh a nih thu sawiin Pu Robert Romawia chuan Mizoram Chief Minister pawhin a ngai pawimawh hle tih a sawi a. Mizo tlangval zingah motor sports zinga lar tak, bike racing-ah India rama champion 4 lai an awm tawh thu REC Chairman chu hrilhin Mizoram sorkar tan infrastructure lian tham siam a harsat avangin Motor sports tlankawng leh a kaihhnawih ruhrel siam nan nuai 1000 mamawh a ni a. Heta 75%, nuai 750 chu REC-in CSR fund atangin thawh se, source dang atangin nuai 250 chu state sorkarin ngaihtuah dan a lo zawng ve ang tiin a rawt a. REC Chairman chuan nuai 500 chin chu a sanction thei a, nuai 750 lai a nih dawn avangin an lo inrawnkhawm vat tur thu leh an thutlukna chu an hrilh thuai tur thu a hrilh a ni.

Sports Minister hian I-League football khelh laia mamawh em em leh, inkhelh chhunga duty tur Ambulance pawh Aizawl FC tan a dil nghal a, REC Chairman leh MD Sanjay Malhotra chuan Aizawl FC chuan a phu a ni, tiin Ambulance leina tur nuai 16 chu sanction nghal a ni ang, a ti bawk.

Pu Robert Romawia Royte chuan Minority Affairs Secretary Pi Renuka Kumar IAS pawh kawmin Mizoram chuan kum 3 hmalamah khan PMJVK/MsDP projects atangin sum a hmu tha lo hle a, chuvang chuan mamawh pawh a ngah bik a ni tiin tun kum 2 liam taa Mizoram tana phal taka sum sanction avangin lawmthu a hrilh a. Project hna khawih tura Central PSU te ti lova Mizoram State Sports Council an pawm avangin lawmthu a hrilh bawk a. PMJVK scheme-in Mizoram pum a tuam theih nan a scheme kalphung siamthat a rawt bawk a ni.