1238/2022-2023 

Aizawl the 13th Juley, 2022 : Vawiin tlai khan Sports Minister Pu Robert Romawia Royte chuan Mizoram State Sports Council Non-Residential Coaching Programme chu Hawla Indoor Stadium, Republic Vengthlang-ah hawngin he hunah hian khuallian a ni. Minister hi MLA Er. H. Lalzirliana leh AMC Councillor Pu David Zohmangaiha leh Culture & Tourism Development Board Vice Chairman Pu TC Pachhunga ten an tawiawm a ni.


Khuallian Pu Robert Romawia Royte chuan Mizoram State Sports Council hmalakna a Non-Residential Coaching Programme hawnna neih a nih chu lawmthu sawiin, Mizoram leh Sports Department bungthar kaina a ni a ti a. Sports chi hrang hrang kaltlanga eizawnna bakah taksa insawizawina hmun tha leh remchang an neih theihnana hmalak zel chu sorkar chuan ngai pawimawhin, Sports Policy tha tak a duang a, he policy hi kalphung fel tak neia duan niin, sports discipline hrang hrangah thawhrimna leh inpumpekna hmanga mizo thalai ten hlawhtlinna an chan theih nana kawng sah kuak sak chu Sports Policy tum lian ber te zing a mi a ni a ti a. He Coaching Programme ah hian coach tha tak tak leh tawn hriat ngah tak tak ten naupang kum 17 hnuai lam tan coaching thla 4 chhung an pe dawn a, hetianga naupangte puala coaching programme kan tan tur hi Sports and Youth Affairs Department hmangin lawmthu a sawi a. Minister chuan he coaching programme hian Mizoram chu India ram chauh nilo khawvel inelna a tel pha chher chhuak thei a, hlawhtlinna a thlen a beisei thu sawiin, bul tanna a awmloh chuan hlawhtlinna a awm theilo a ni a ti a. Non-Residential Coaching Programme ngaihtuah chhuaktu coaching staff leh officer te an chhuanawm hle a, he programme hnuaia discipline hrang hrang Basketball, Tennis, Table Tennis, Boxing, Weightlifting, Wrestling ah hmasawnna tam tak awm se, thahnem ngai takin trainee te pawhin an beih fat fat tur a ni tiin a sawi a. Theihtawp chhuaha nu leh pa te pawn an fate chu Sports lama hun an hman tam theihnan tang turin leh hriatthiamna thui tak nei tur pawhin a ngen in a chah bawk a, Mizo ten sports lama rual kan elna kawngah dinhmun pawimawh tak an chelh a, an fate coaching programme an kal tir chu ram tan, mahni tan a ni tih hre turin a ngen bawl a ni.

Mizoram State Sports Council Non-Residential Coaching Programme ah hian Basketball coaching kal mek mipa naupang 51 leh hmeichhe naupang 1 an awm a; Boxing coaching kal mek mipa naupang 30 leh hmeichhe naupang 4, Table Tennis coaching kal mek mipa naupang 30 leh hmeichhe naupang 8; Tennis coaching kal mek mipa naupang 23 leh hmeichhe naupang 16; Weightlifting coaching kal mek mipa naupang 24 leh hmeichhe naupang 16 leh Wrestling Coaching kalmek mipa naupang 17 leh hmeichhe naupang 13 an awm a, an vaiin 227 an ni. Coaching Programme hi thla 4 chhung niin, session a zawh hunah admission hawn leh tur a ni ang a, coach ten trainee te performance record in, an nu leh pa emaw enkawltute (guardian) hnenah feedback an pe thin bawk dawn a ni.

He hun hi Mizoram State Sports Council Secretary Pu John Tanpuia'n a kaihruai a, Sports Promotion Officer Pu H. Laldinsanga hnen atangin Report ngaihthlak a ni a, Trainee ten Drill Display neiin, Senior Sports Promotion Officer Pu R. Lalrinmawia'n lawmthu sawiin he hun hi a khar a ni. 

Attachment

  • Loading attachment...