1691/2023-2024

Date 29th August, 2023 : Vawiin khan National Sports Day 2023 chu SAI Training Centre, Mission Vengthlang, Aizawlah hman a ni a. Sports Minister Pu Robert Romawia Royte chu khuallian niin a hmanpui a. Major Dhyan Chand Best Athlete Award lawmman a sem bawk.

Minister Pu Robert Romawia Royte chuan thu sawiin, infiammi kalkhawmte chu National Sports Day chibai a buk a. Covid hripui avanga India ram chhung state dang zawng zawng aiin Mizoram chu inkharkhip rei bik in, chuti chung chuan tunhnaia Mizo infiammi ten International Medal 166 leh National Medals 388, Regional Medals 296, a vaiin Medals 850 lai an hlawhchhuak chu ropui a tih thu a sawi a. Asian Games awm tawh tam takah Mizote kan tel pha ve lo thin a, kumin Asian Games lo awm turah erawh chuan Mizo thalai infiammi an tel tur chu lawmawm a tih thu a sawi.

Sports infrastructure siam kawngah pawh Mizoram sorkarin nasa takin hma a lak thu Minister hian a sawi a. Hei hian medals mai ni lo, hriselna leh zirna kawngah pawh nasa takin hmasawnna a thlen mek a ni a ti. Sports Minister chuan school hrang hrangte chu mumal taka sports kalpui turin a fuih a. Infiammite chu theihtawp chhuah tura fuihin ruihhlo laka inthiar fihlim reng turin a fuih bawk a ni.

Khuallian Pu Robert Romawia Royte chuan International Boxer player pahnih - Zorammuana leh Rudy Lalhningmuani te hnenah Major Dhyan Chand Best Athletes Award a hlan nghal a ni.

Asiam Games ah hian Mizo thalai pathum - Lalremsiami, Hockey; Lalchungnunga, Football leh Lalengmawia Ralte, Football te Asian Games-a tel tura tihchian tawh niin, mi pathum dang - Vanlalthlamuanpuia, Taekwondo, Hmangaihsangpuia, Karate leh Lalhumhimi, Judo te buaipui mek a nih thu vawiin hian sawi a ni.

He inkhawmah hian Pu Lianhmingthang Tonsing, Regional Director, SAI NERC Imphal leh Dr. Lalrozama, IAS, Sports Department Secretary ten thu an sawi bakah Pu Lalnunhlua, Director, Sports & Youth Services Department kaihhruaiin Fit India pual thutiam sawi rual a ni a. Fit India Mobile App chungchangin inhrilhhriatna neih a ni bawk.

Sports Authority of India Training Centre, Aizawlah hian sports discipline pali - Boxing, Judo, Taekwando leh Weightlifting kalpui mek a ni a, tunah hian infiammi 44 ten ngawrh takin training an nei mek a, Coach pathumin an enkawl a ni.

He National Sports Day lawmnaah hian SAI staff leh SYS staff ten Futsal friendly match an khelh bakah infiamna game hrang hrang khelh a ni bawk.

National Sports Day lawmna programme hi thuang hnih ah then in, thuang hnihna hi tlai lamah Jenny R.Lalremliani, DSP, Mizoram Police, World Boxing Champion 2006 hovin hman a ni.