Sports and Youth Services Minister Pu Zodintluanga chuan vawiin chawhnu dar 1 khan Regional Institute of Paramedical and Nursing Sciences (RIPANS)-ah kumina Department 6-atang zirlai pass thar te graduation lawmna leh Bachelor of Nursing zirlai thar 35-te lawmluhna Lamp Lighting Ceremony chu a hmanpui.
Kumin hian Bachelor of Nursing, Bachelor of Pharmacy, Bachelor of Science in Medical Laboratory Technology, Bachelor in Optometry, Bachelor of Science in Radio Imaging Technology leh Master of Pharmacy atangin zirlai 161 graduate an awm a ni.
Khuallian Sports Minister Pu Zodintluanga chuan RIPANS chu North East ramte tan a tangkai thu leh Mizorama awm a nih angin Mizoten kan hmang tangkai lehzual chu lawmawm a tih thu a sawi a. Tunlai khawvel changkang zelah inelna a san zel avangin intuaihriam a tul thu leh chutiang inbuatsaihna atan chuan RIPANS chu a pawimawh a ni, a ti a. Minister chuan RIPANS zirlai leh graduate te chu fuihin damlo enkawlnaah dawhtheihna, hawihhawmna, tawngkam tha leh hmangaihna nena in enkawl chuan mipui rilru mangang pawh in thawi dam thei ang, a ti a. RIPANS zirchhuakte chu North East mai nilovah India ram hmun hrang hrangah thawkin fak an hlawh thin chu lawmawm a tih thu leh hetiang ang zirlai chherchhuak thei tura zirtirtu leh RIPANS hotute inpekna chu chhuanawm a tih thu a sawi bawk a ni.
He hunah hian RIPANS Director Dr. Chawngthanliana chuan inlawmna thu sawiin Lamp lighting chu Dr. Unmona Borgohain Saikia; Principal; Asian Institute of Nursing Education in a kaihruai a. Sports Minister Pu Zodintluanga chuan zirlai titha zualte hnenah proficiency award a sem nghal bawk a ni.
RIPANS hi kum 1996 khan North Eastern Council chuan India hmar chhak mi te tan Paramedical leh Health Sciences bik zirna atan a din a ni a. Kum 2007 April thla atangin Sorkar laipuia Ministry of Health & Family Welfare hnuaiah an awm ta a ni. Tun dinhmunah course hrang hrang, heng - B.Sc Nursing, B.Sc Medical Laboratory Technology, Bachelor of Pharmacy, B.Sc Radio Imaging Technology, Bachelor in Optometry-te leh, kum 2014 atanga siam belh, Post graduate zirna, Master of Pharmacy-te awm in India hmarchhak state hrang hrang atangin seat hauh sa (quota) neiin zirlai 682 an awm mek a ni.
