955/2022-2023
Aizawl, 19th June, 2022: June 17, 2022 khan Sairang Higher Secondary School chuan HSSLC Exam-a an tihthat lawmna Sairang Hall-ah an nei a, Sports Minister Pu Robert Romawia Royte leh Bialtu MLA Pu Zothantluanga ten an hmanpui a ni.

Sports Minister Pu Robert Romawia Royte chuan zirna chu changkanna bul a ni a, mirethei leh harsa zawkte pawh zirnaa an hlawhtinna avangin mi awhawm tam tak an awm tawh a ni, a ti a. Sairang HSS ten result tha tak an nei thin chu lawmawm a tih thu sawiin, zirtirtute leh zirlaite bakah Management Board leh zirlai hlawhtling chhungte zawng zawng a lawmpui thu a sawi a, tan la chhunzawm zel turin a fuih a, Sairang HSS te lawmpui nan Computer set 1 pek a tiam bawk a ni.
Sports Minister chuan Sairang chu hmun pawimawh ni chho mek a ni a, khawtlangin an mamawh avanga sum thawh khawma Football Field tur an lei thei chu a fak a. Field changtlung tak laih dan tur Sorkarin a ngaihtuahpui dawn a ni a ti.

Khualzahawm, Bialtu MLA Pu Zothantluanga pawhin thu sawiin thiamna tak tak neih a pawimawh ber a, certificate ringawt ni lovin a taka thiam a tul a ti a. Sap tawng leh Hindi pawh zak lova hmang uar turin a fuih a. Khuallian leh Khualzahawmte hian Sairang HSS te hi infiamna hmanruate an pe a ni.

He hun hi Sairang VCP leh HSS Board Chairman ni bawk, Pu H.Laldingliana’n a kaihruai a, Pastor K.Zonunsanga'n hunserh hmangin zirlaiten hnamlam an entir a. HSS Principal Pu P.C.Lalfakzuala’n Report pein Sihhmui VCP Pu VL.Chhanhima'n lawmthu sawiin hun hnung a khar a ni.

Attachment

  • Loading attachment...