1201/2024-2025

Aizawl dated 17th July 2024: Vawiin chawhma khan Tuikual South Branch MHIP buatsaihin ‘MHIP Golden Jubilee Lawmna’ hun chu YMA Hall, Tuikual South-ah hman a ni a. Pu Lalnghinglova Hmar, Minister, Sports & Youth Services Department, bialtu MLA ni bawk chu khuallian niin Pi H. Lalawmpuii, President, Tuikual South Branch MHIP-in hun a kaihruai a. Tuikual South branch MHIP huam chhung a member kum 70 chunglam te hnen ah thil pek hlanna hun neih a ni.

Khuallian, Sports Minister Pu Lalnghinglova Hmar chuan Tuikual South MHIP branch buatsaih a MHIP Golden Jubilee lawmna a kalkhawmte chu chibai bukin MHIP member 1617 awmna branch an nih angin khawtlang tihhmasawn leh siamthat kawngah MHIP hmalakna chuan awmze thui tak a neih ngei a rin thu a sawi a. MHIP thuthlung pakua te chu midangte tan a entawntlak ni thei tur khawpa a tak a nunpuitu nih tum theuh turin kalkhawmte a chah a ni. Minister chuan chhungkua leh khawtlang tihhmasawnna kawng ah nu berte mawhphurhna chu mawhphurhna pawimawh berte zing ami a nih thu tarlangin nu berte ngaih pawimawh leh rilru pek tamna a zirin hmasawnna hi a chakin a chak loh theih bawk thu a sawi a. Chhungkaw pawn lam a hlimna um thinna chuan chhungkua a tih chhiat thin thu sawiin chhungkua a hun hman tam leh inpawhna tha neih a pawimawh thu a sawi bawk a ni.

Pu Lalnghinglova Hmar chuan zirna, hnathawhna hmun ah leh inelna hrang hrangah hmeichhiahten hotu leh hmahruaitu nihna dinhmun an luah nual tawh thu sawiin ram roreltu ni tur pawhin mipuiin hmeichhia ah rinna thui tak an nghah ngam tawh thu a sawi a. Chhungkua leh khawtlang tihmasawntu nih tum zel turin leh an pawimawhnate hre chung a hmalam pan zel turin kalkhawmte a fuih a ni.

Sports Minister chuan ruihhlo chu ram leh hnam hmelma, chhungkua leh khawtlang tihrehawm theitu a nih angin ruihhlo dona kawng ah Khawtlang, Kohhran leh Sawrkar thawh hona a pawimawh thu a sawi a. Ruihhlo that lohna inzirtirna mai piah lam ah ruihhlo bawih a tang mek te chhanchhuak turin a tak a pen chhuah a tul thu a sawi a. Chutiang a hmalakna tihlawhtling tur chuan MHIP Golden Jubilee lawmna a lo kal, tlawmngai pawl hrang hrang leh kohhran hruaitute chu thawhho pui ah a sawm nghal a ni.

MHIP Golden Jubilee lawmna hun ah hian Pi Lalbiakmawii, Asst. Secretary chuan MHIP thuthlung sawi rualna hun a kaihruai a, Pi Zonunsangi, Secretary atangin MHIP Tuikual South Branch hmalakna hrang hrang ngaihthlak niin member boral 17 boral te pualin sunna hun hman a ni a. Khawtlang hruaitute atangin thusawi ngaihthlak niin member kum 70 chin chunglam hnen ah thilpek hlanna hun neih a ni a. Pi Thansangpuii, Treasurer chuan lawmthu sawina hun a hmang bawk a ni. 

Report-a tarlan danin Tuikual South Branch MHIP hnuai ah hian member 1617 an awm mek a. Member kum 70 chunglam mi 50 hnen ah thil pek hlan an ni.