Special Olympics World Summer Games, USA-a India aiawha tel tur Mizo infiammi paruk leh coach pakhat hnenah vawiin khan Sports  & Youth Services Minister Pu Zodintluanga chuan Kit Allowances Rs.10,000/- theuh a hlan.

Mizorama Special Olympic Bharat (SOB) infiammite hnenah Sports Minister leh Mizoram State Sports Council President ni bawk Pu Zodintluanga chuan India ram aiawha fehchhuakte turte thlahna hun hi hmanpuiin, Special Olympic-a Mizo te an tel thei ta chu hun chhinchhiahtlak a nih thu leh result tha tak nen lo haw a India tihmingthatu ni turin duhsakna a hlan.

MSSC chuan khawvel huap inelna liana India aiawha fehchhuakte Kit Allowances hi a pe thin a, Sports Minister-in Kit Allowances a hlan hma hian MSSC chuan an Office, Upper Khatla ah India ram aiawh turte hak tur Track Suit an lo hlan ve tawh bawk ani. July 23 atanga August 3, 2015 chhungin Los Angeles, USA-ah Special Olympics World Summer Games hi neih a ni dawn a, India ram aiawh turin infiammi 6 bakah coach 1 an tel ang.Coach Sarah Lalmuankimi chu India Basketball Female Team head coach turin a kal dawn nghe nghe a ni. Rilru lama rualbanlo, India aiawha fehchhuak turte hian Pathianni lo awm turah Aizawl chhuahsanin Kolkata an pan ang a, Kolkata atangin University of California, Los Angeles, USA an pan leh ang. Ruahman ang chuan August 6-ah India ramah an lo let leh dawn a ni.

Special Olympic-a tel turte chu - 11 a-side (football)-ah Alfred Lalchhanhima s/o R Zonunmawia, Lalmawizuala s/o Lalhmangaiha (L); 7 a-side (football)-ah Thanghmingliana s/o Vanlalrema (L), Lalfakzuala s/o Lalhmingthanga leh Lalthansanga Fanai s/o Lianzuala Fanai; athletics (100-200m)-ah Zohlupuii d/o Zothankima (L) te an ni. Lalthansanga tih loh hi chu Gilead Special School-a zirlai vek an ni.