No.4092/2021-2022  

Aizawl, 23rd February, 2022 : Nimin February ni 22  khan Sports Minister Pu Robert Romawia Royte leh Cricket Association of Mizoram hotute Sports Minister Chamber-ah an inkawm a, Mizorama Cricket hmasawnna tur zau takin an sawiho.       

Sports Minister chuan tunhnaia nasa taka Mizoram Cricket hmasawnna chu hnam ang pawha thil lawmawm a ni, a ti a, CAM leh BCCI chungah lawmthu sawiin Cricket chu Mizote thiam zawng tur chi eizawn nan mai ni lo, hausak nan pawh an la hmang thei a ni a ti.      

CAM President Pu Robert Lalfamkima chuan CAM bultumin Cricket Academy 18 an kalpui mek thu sawiin, BCCI support-na an dawn that thu a sawi a. CAM hruaitute chuan Suaka Cricket Stadium-ah Indoor Cricket Hall changtlung tak Rs 1,000 lakh senga sak tan mek a nih thu leh Aizawl area-a training-na hmun leh stadium changtlung tak sakna tur hmun an mamawh thu leh a sum sen tur chu BCCI-in a pek theih thu Sports Minister hi an hrilh a, a tanpuina an ngen a ni.        

Sports Minister chuan theihtawp chhuahpui a inhuam tih sawiin Cricket hmasawnna tura a ngaih pawimawhte a lo hrilh bawk. Sports Minister chuan district 11-a sikul 1 theuh tal Cricket Adopted School neihte, Inter School Cricket Competition neihte, sports discipline tinin naupang talent nei tha an duhin an chuh vek a, CAM pawhin nasa zawka naupangte atanga talent tha hmuh chhuaha cricket-a tuitir chu ngaih pawimawh tul a tih thu a sawi.  

Minister chuan hun reilote chhunga cricket players ten Rs 1300 lakh chuang an hlawhchhuak chu a ropui a, CAM-in kum tin Rs 1,000 lakh BCCI atanga an dawng ziah te leh Sorkara GST an chhun luh pawh Rs 750 lakh zet a tling chu a ropuiin a hlu a, Mizorama Sorkar Corporation thenkhat aiin sum a thawkchhuak tam zawk a ni a ti a, infiamna hi industry lian leh pawimawh, ram hmasawnna thlen mektu a nihzia a tilang chiang hle a ni a ti. CAM-in tournament an buatsaih thinah season khatah prize money atan Rs 80 lakh an hman thin thu an sawi.     

CAM hian Sports Minister-in Cricket hmasawnna atana ngaihtuahna a sen nasatzia leh a tuipuizia an hmuhin lawmawm an ti hle tih an sawi. He meeting-ah hian CAM President Pu Robert Lalfamkima, Secretary Pu Mammon Majumdar, BCCI Member ni bawk leh OB dangte an tel a ni.

Attachment

  • Loading attachment...