Table Tennis-a Mizoram hmasawnna tur kawng ngaihtuahin vawiin khan Sports Minister Pu Zodintluanga chuan Mizoram Table Tennis Association (MTTA)hruaitute chu a office ah kovin hma lakna tur thil pawimawhte a sawipui.

Pu Zodintluanga chuan infiamna hrang hrang zingah Table Tennis chu Mizo thalai ten India ram pum huap leh ram pawn lam thlenga hming an chher theihna tur pakhat a ni tiin MTTA hruaitute chu thahnem ngai taka hma la turin a ti a. Naupang te te atanga bul tana, national level atana mi beisei awmte thlur binga chher hriam dan tur leh an kal zelna tur kawng sah kuak dan tur te Sports Minister chuan a sawipui a. MTTA ten anmahni puala hall leh hmunhma an la neihmumal loh chungchang pawh he meetingah hian sawiho a niin hei hi Table Tennis-a Mizo naupangte harsatna lian ber pakhat a nih thu MTTA hruaitute chuan an sawi a. Sports Minister chu theihtawp chhuaha hma lak sak turin an ngen a ni.