No.6063/2020-2021 

Zan khat riaka Lunglei rawn zin Sports & Youth Services, Tourism leh ICT Department-te changtu Minister of State Pu Robert Romawia Royte chuan nimin khan Zobawk, Ramthar, Lunglawn, Electric Veng, Salem Veng leh Rahsiveng-a sports infrastructure hrang hrang ruahmanna turte a tlawh hnuin tukin zing khan Thuamluaia Mual leh Venghlun field a tlawh leh a ni. SYS Minister hian nimin Press Conference a neih naah Lunglei District tan Lunglei District Sports Complex, Zobawk Residential Sports School te bakah Astro Turf Hockey Ground, Astro Turf Football Ground, Standard Futsal Ground pahnih din anih tur thu a puang a ni. Heng Project-te hi a zavaiin cheng nuai 10,909.20 senga ruahman tur a ni. Sports lama inkaihhruaina mumal tak Mizoramin a neih Sports Policy 2019 kaltlangin infiamna discipline hrang hrang tih hmasawn tum a nih thu leh Mizoram thalai tam zawk ten Sports hmanga eizawnna an neih theihna tura hmalak zel anih tur thu Sports Minister hian a sawi .

Tukin vek khan Serkawn Sikulpui-ah Serkawn khawtlang hruaitute leh tlawmngai pawl hrang hrang aiawhte Sports Minister nen inkawmhona hun hmangin nikum 5th December-a hawn Lena Stadium enkawl dan tur chungchang an ngaihtuah ho a. Serkawn khawtlang te hian Lena Stadium enkawl chungchanga hmalak an duh dan leh an ngaih pawimawhte Sports Minister hnenah hian lo thlenin hemi chungchang hi zalen taka sawihona hun an hmang a. Sports Minister chuan an hmalak duh dan te lehkha a thehlut tura hrilhin tun thla chhung ngeia hemi chungchang chinfel a duh thu Serkawn khawtlang hruaitute hi a hrilh a ni.

Hemi bakah hian Zotlang Tourist Lodge tlawh bawkin helai hmun hi Tourist Centre changtlung tak din tura ruahmanna siam anih thu sawiin sawrkar laipuiah project siama thehluh anih tawh thu a sawi.