3084/2024-2025

New Delhi, the 19th of November, 2024: Vawiin chawhnu khan Pu Lalnghinglova Hmar, Minister of State, Sports & Youth Services Department chu HCL Foundation leh World Bank hotute nen an office-ah an inkawm a, Mizoram hmasawnna tura thawhho theih dan an sawiho.

New Delhi-a châm mek Sports Minister Pu Lalnghinglova Hmar hi Noida, UP a HCL Campus-ah Col. Gopal Karunakaran, CEO, Shiv Nadar School leh HCL hotute nen an inkawm a. India in Olympics 2036 thlen a tum mekah Mizoram chuan tel ve ngei turin hma a la tan tawh tih a sawi. “Mizote’n sports-ah talent kan nei tha a, sports budget-ah pawisa kan dah tam theih loh avangin kan thalaite theihna tak tak phochhuak turin pawl rintlak thawhpui kan duh” tiin HCL hotute chu a hrilh.  Sports chu Mizo mipuite tan intihhlimna piahlamah eizawnna, inpumkhatna leh ruihhlo dona hmanraw tangkai tak a nih thu a sawi. 

Sports Minister chuan sawi chhunzawmin, Mizoram chu India ram state zingah Olympic 2036 vision nei chunga Sports Conclave buatsaih hmasa ber a ni a ti a. Mizoram khua zawng zawng huam thei tur sports coaching leh talent haichhuah project kalpui turin hma lak mek a ni a, State Sawrkar pawhin Bana Kaih (Handholding) scheme hnuaiah sum engemawzat a dah tawh thu a sawi. State Sawrkar in football academy pahnih a enkawl mekte chu result atanga tehin India rama academy tha ber ber te elpha a ni a, academy graduate zingah India tâna khel pha engemawzat an awm thu a tarlang a. Academy changtlung leh hlawhtling lehzual siam turin thawhpuiah a sawm a ni. 

Shiv Nadar CEO leh HCL hotute chuan Minister hi tha taka lo dawngsawngin, CSR kaltlanga state hrang hranga sports hmasawnna hna an thawh dan te an tarlang a. Sports-a Mizoram hmathlir chu an hawizawng nen pawh a inmil hle a ni tih sawiin, Mizoram sports academy te chu Noida-a Vidyagyan academy an kalpui mek nen thlunzawm dan ngaihtuah tel nise an duh thu te an sawi. Chiang zawka thawhho dan tur ngaihtuah chhunzawm turin an inthlah a ni. 

Pu Lalnghinglova Hmar hi vawiin chawhma khan Pi Benedicté, Lead Economist, World Bank nen pawh New Delhi-a World Bank office-ah an inkawm a, Mizoram-ah sports development kaltlangin tourism, urban development, hriselna leh ruihhlo do kalpuina remchang a awm thu a thlen. World Bank leh India Sawrkarin thawhhona thuthlung an ziah tur zulzuia la inbiak leh nise an inthlah a ni.

Vawiina meeting-ah hian Pu John Tanpuia, Joint Secretary, S&YS Department leh Pu H. Lalramenga, PS te’n Minister hi an tawiawm a ni.