1095/2024-2025

Aizawl, the 6th July 2024 : Vawiina Mizoram Hmeichhe Insuihkhawm Pawl (MHIP) Kanan Branch in MHIP Day lawmna Kanan Community Hall-ah an buatsaih chu Sports & Youth Services Minister Pu Lalnghinglova Hmar in khuallin niin a hmanpui.

Pu Lalnghinglova Hmar chuan Mizoram a pawl hlun leh pawimawh tak MHIP in kum 50 a tling chu lawmawm a tiin Mizoram tan MHIP chuan kum 5 chhungin nasa takin hmeichhiate dinhmun chawikanna kawngah te, ram leh khawtlang siamthat kawngah te nasa takin an thawh thu te a sawi a,  Mizo hmeichhia zawng zawng te Jubilee duhsakna chibai a hlan bawk a. Hmeichhe pual bik ni ah hian nu ropuina leh pawimawhna kan zir thar a ngai a, mahni nu te kan duat mai hi a tawk lova, kan zah tel a ngai a, chungtiang bawkin hmeichhia te zahawmna kawngtina kan humhim hi mitin ten kan tihmakmawh tur thil a niin ka hria, a ti.

Chhungkuaah hmeichhia te mawhphurna leh pawimawh dante sawiin kan rama buaina tam tak hi chhungkua atanga intan leh irchhuak a ni fo thin a, nuten chhungkuaah pawimawhna lian tak an nei a, chuvangin nuten an mawhphurhna hi engtik lai pawhin an hriat thar reng a pawimawh hle a ni, a ti. Tunlai khawvelah hmeichhia ten kawng hrang hrangin hma an sawm zelin an dinhmun pawh a sang chho zel a, Mizoram ngei pawh tun tum inthlan khan a vawikhatna atan hmeichhia 3 te chu MLA a thlan tlin an ni a, Cabinet Minister pawh kan nei hial a, hei hian Mizo hmeichhiate tan sawrkar hna leh sumdawnna mai nilo politics hmanga ram leh mipui rawngbawl leh kaihhruai hnaah pawh kawng a inhawng zau zel ani tih a ti chiang hle in ka hria, a ti bawk.

MHIP Day, an pawl Golden Jubilee lawmna ni bawk programme hi MHIP Kanan Branch President Pi Lalthlamuanin kaihruaiin Pi Lalmuankimi Hnamte atangin Secretary Report ngaihthlak a ni a. Intihhlima leh zaihona ten nen nilengin hun an hmang a ni.