387/2026-2027

New Delhi, the 6th of May, 2026 : New Delhi-a cham mek Sports and Youth Services Minister Pu Lalnghinglova Hmar leh Pu Hari Ranjan Rao, Secretary, Ministry of Youth Affairs and Sports chu nimin tlai dar 5:00 khan Sports Authority of India Headquarters, New Delhi-ah an inkawm a, Mizorama sports hmasawnna tur, a bikin hockey chungchanga hmalak dan tur an sawi.

Sports Minister Pu Lalnghinglova Hmar chuan, "Mizote game thiam chi ni si, tun hnaia kan khelh tam tawh loh hockey hi India tana international medal lak theihna kawng hnai a ni a, Thenzawla hmeichhe hockey zirna kan neih hi kan țhatpui em em a, hetiang model hian mipa tana hockey zirna siam kan duh a ni," a ti. 

Pu Lalnghinglova Hmar chuan Empowering Mizoram Sports hnuaia discipline pali - hockey, badminton, archery leh wrestling-ah te SAI Training Centre din belh theih dan ngaihtuah ni se, tiin rawtna a siam bawk. Director General of SAI ni bawk Pu Hari Ranjan Rao chuan hockey tihhmasawnna kawngah theihtawp chhuah a nih tur thu leh, infrastructure awm sa hmang ṭangkaia a zirna changtlung zawk siam theih dan an lo zir chian tur thu a sawi a, India sorkar pawhin hockey chu a ngaih pawimawh thu a sawi bawk a ni.

Sports Secretary chuan, "Mizoram in sports hmasawnna tur hmathlir (vision) fel tak in nei a, hemi bawh zuia in kal chuan Mizoram hian India sports hmasawn zelnaah dinhmun pawimawh in luah thei ang," a ti a, chutihlaiin India huap inelnaah chet ṭhat chhoh zel a ṭul thu a sawi.

Sports Secretary hian tun hnaia badminton lama Mizoram hmasawnna a lo hriat thu leh lawmawm a tih thu a sawi a, football-a Mizote hlawhtlinna chu sports dangah pawh thil tih theih a nih a rin thu a sawi a, Khelo India accredited training center ni tura  Mizorama sports zirna kalpuina hrang hrang chu her rem ṭha a tih thu a sawi.

Sports Minister Pu Lalnghinglova Hmar hi Pi  Shweta Chauhan, IPS, Resident Commissioner, Mizoram House-in a ṭawiawm a ni.