No.6539/2020-2021

Dated Aizawl, the 13th November, 2020 : Vawiin khan Minister Pu Robert Romawia Royte chuan a department chan pahnih hnuaia hnathawh mekte - Armed Venga 1st M.A.P. Ground-a Field Chhawng sak tan mek leh Phullem phahna tur, kumin July ni 30-a Chief Minister Pu Zoramthanga’n lungphum a lo phum tawha hnathawh mek chu a hmunah kalin a tlawh a. Hun tiam chhunga hna thawh zawh hman a nih theih nan leh hna tha taka thawh a nih theih nan Local Council, YMA leh NGO dangte lo vil turin a sawm. He hmun a tlawh zawh hian a bial Aizawl East-II chhunga Armed Veng South-a SEDP hnuaia Rs 30 lakh hmanga inkal pawhna kawng siam hnathawh mek chu a hmunah a tlawh a. Hnathawktuten Veng mi an nihna anga neitu rilru pua hna tha taka an thawk chu lawmthu a hrilh a ni.

Vawiin vek khan Tourism Minister Pu Robert Romawia Royte chuan Tourism department-in Rawpuichhipa Swadesh Darshan 2 (SD2) hnuaia hna chi hrang hrang  19 thawh mek pawh tlawhin, chak zawka hnathawh chhunzawm a duh thu a sawi a. He SD2 hi Ministry of Tourism atanga sum hmuh hmanga project hnathawh kalpui a ni a, tunah hian 46% vel hna hi zawh tawh a ni.

Pu Robert Romawia Royte hian Lengpui Astroturf phah hnathawh mek chu a hmunah a tlawh bawk a. Covid-19 hripui leng kara Central suma hna chatlak lova hnathawh a ni chu lawmawm a tih thu a sawi a, hetianga sanction hmasa rang taka hman zel avang hian tun hnaiah pawh Khelo India atang pawhin sum hmuh belh a nih thu a sawi a, Minister chuan Covid avangin Sorkar leh mipuiin sum harsatna kan tawk nasa a, Central sum atanga Mizoram Sorkarin Tax a dawn zung zung theih nan leh mipuia sum lengvak a tam nan Central sorkar projects sum hman zung zung a tul thu a sawi.

Tourism Minister ni bawk Pu Roberta chuan ramri buainaah Sorkar leh NGOs te, Zirlai pawlte thawhhona a ropui a tih thu sawiin, Zoram pawn hmun hrang hranga Zo chi peng hrang hrangten Mizoram min tanpuina te kha a ropui a, hengte avang hian Mizoram Sorkar leh mipui te chu Sorkar dang leh Central sorkar hmuhah pawh a mawi hle a ni a ti. Hun danga ramri buaina anglo takin tun tum buainaah hian Sorkarin hma a hruaia, Sorkar Force ten ralthuam nen a hmun pawimawhte an luah hmiah zel a, Mizoram sorkarin a tawp a thleng ngam tih hi thenawm state leh Central Sorkar pawhin a hria a ni, tangrual zel ang u a ti.

Sport Minister Pu Robert Romawia Royte chuan Sairang Dinthar Venga Mizoram Football Association (MFA) Playground Astroturf phah a tlawh bawk a. He MFA play ground hi FIFA-in a siamsak niin Mizoram Sorkar pawhin sumin a pui ve a, Covid avangin khaihlak deuh mahse hman theih tura peih fel thuai beisei a ni.

Sports Minister hi Mamit bialtu MLA Er. H.Lalzirliana, Vice Chairman, Road & Infrastructure Development Board, Pu Saitluanga, Jt Director, Tourism,  Pu Lalruatsanga Tochhawng, S.P, Wireless, MSSC Astt. Engineer Er. James Lalramnghaka,  SYS Dy Director Pu Vanlalrova leh official pawimawh dangten an tawiawm a ni.