2554/2022-2023
Aizawl the 7th November 2022 : Inrinni khan Kawnpui Field No 2 a hmuna tlawhtu Sports Minister Pu Robert Romawia Royte chuan Kawnpui Field No 2-ah hian Phullem phah a ni dawn thu a sawi a, hna pawh tan thuai tum a ni a ti. Field pavillion-a khawtlang hruaitute leh Kawnpui Zone Football Association leh Phullem Field Demand Committee hotute nena an inkawmnaah Sports Minister chuan Kawnpui Field No 2 chu a area a tet deuh avangin a theih chinah tihlen a ni ang a, phullem tha chi FIFA approved quality hman a ni ang a ti a.

MSSC Engineer Lalfamkima pawhin design dan phung leh a components awm turte sawiin SASCI scheme atanga sak tur a nih thu leh Rs 600 lakh sanction a nih thu a sawi a, retaining wall, pavillion leh security fencing te siam tel a nih tur thu a sawi a, tunlai technology thar Drainboard System hman a ni ang a ti.

Kawnpui khawtlang aiawhin Pu Vanlalchhunga Chairman Kawnpui Jt VC-in field tha an neih dawn avanga mipui leh thalaite an lawmzia sawiin Mizoram sorkara Chief Minister, Sports Minister leh Bialtu MLA chunga an lawmthu a sawi bawk.

Tourism Minister ni bawk Pu Robert Romawia Royte chuan Khamrang khua pawh tlawhin Village Council leh khawtlang hruaitute nen an inkawm a. Tourism Minister chuan kan lo sawi tawh angin Khamrang khua hi Eco Tourism Project hmun pawimawha siam tumin Mizoram sorkar Tourism Department DPRs a siam a, tun hnaiah Rs 800 lakh sanction a hmuh thu sawiin, Khamrang mipuite a lawmpui takzet thu a sawi a.

Tourism Minister Pu Robert Romawia Royte chuan Responsible Tourism Policy tihhlawhtlinna a nih angin tualchhungin a zar an zo theih dan tur chu an ngaihpawimawh a nih thu a sawi a.

Khamrang VC aiawhin VCP Pu Laithanga'n lawmthu a sawi a ni.

Minister hi Pu V Lalengmawia, Joint Secretary Tourism, Pu K. Lalrohlua Director, SYS ten an tawiawm a ni.