No.2980/2021-2022

Aizawl the 11th November. 2021 : Sports & Youth Services Department bultuma YHAI Mizoram State Branch  buatsaih Phawngpui tlanga Trekking leh Palak Wildlife Sanctuary-a Nature Study nei tura kal YHAI Trekker-te chu Sports Office kawt aṭangin tukin zing dar 6 khan Pu Robert Romawia Royte, Sports Minister leh YHAI State President ni bawk chuan a vailiam (flag-off).

Trekker-te vailiamna hun hmanah Pu Robert Romawia Royte chuan thusawiin YHAI-in thalaite tana hetiang trekking an buatsaih thei hi a lawmawm a, ṭhalaite hawiher tihzau a, ram hmasawnna tan pawha mi ṭangkai tak ni turin ṭhalaite inchher chhoh dan kawng ngaihtuah zel ang a ti. Khawvel hun inher chho mil zela ṭhalaiten rilru leh taksa hriselna lamah hmasawn zel a pawimawh a, chutiang atan chuan heng trekking programme leh nature study te pawh a ṭangkai taka hman thiam a pawimawh a ni a ti bawk.Tukina vailiam ta ṭhalaite chu hetiang trekking & nature study programme an tel thei chu an vannei hle a, an kalho chhungin thian thar pakhat tal siam chu 'mission' ah nei theuh turin Minister chuan a chah.

Trekking-a kalte hi mi 10 an ni a, YHAI State Secretary Pu Moses Lalthanpuia, SYS State Adventure Organiser chuan a hruai a ni. Tukina flag-off ah hian SYS Deptt lam aṭangin Joint Director Pu K. Lalhmangaihzuala leh officer dangte bakah YHAI State Chairman Pu Zodinsanga leh Vice President Pu Lalhmingmawia Colney ten Minister hi an ṭawiawm a ni.