Academy of Integrated Christian Studies (AICS) chuan vawiin atang khan ram pum huapin ni hnih awh tur seminar an nei tan a; he seminar hi Sports Minister Pu Zodintluanga chuan Pastor Thanzinga Chapel-a inkhawm buatsaihah a hawng. He national seminar-ah hian India rama Tribal leh Tual-to hnamte dikna humhalh leh an chanvo hlenchhuah chungchang zirho a ni a, hmar-chhak biala chengte chungchang chu thlurbing a ni.

Pu Zodintluanga chuan, “India rama hnam chi hrang tam tak zingah keini hmar-chhak biala tribal-te hian India ram mipui nawlpuite nena inpersan tak - pianphungah te, hnam ziarangah te, khawsak phungah te, sakhaw biak danah te leh tawngahte thlengin kan nei hrang thliah a. He kan danglamna avang hian hnam lian zawkte kara kan khawsakna kawngah harsatna danglam deuh kan tawng fo thin a; chuti ang harsatna chi hrang kan neihte leh a chinfel theih dan kawngte zirchianna seminar AICS-in a buatsaih hi thil lawmawm tak a ni” a ti. Pu Zodintluanga chuan, “Hmar-chhak biala tribal-te hian danglamna tak kan neih avang hian hnuaichhiah leh en hran deuh nia inngaihna rilru kan pu fo thin a; hei hi mahnia ro inrel hran chak avanga India laka tal chhuah tuma tharum thawh a hluarna chhan pakhat pawh hi a ni thei awm e” a ti bawk.Seminar chhimtute leh zirho tur thu chhawpchhuaktu turte chu an sawihona atanga thutlukna mumal tak siam a, mi dangte tana an thupui zirhona atanga bengvarna leh hriatna thar pawchhuak tura an ngaihtuahnate seng tura fuihin, Pu Zodintluanga chuan, “Harsatna chi hrang tam tak kan tawh mek karah hian hmabak hlenchhuah tur tam tak kan la nei bawk a. Heng zawng zawngte hi rilru hnual miah lova hmachhawn thei turin kan rilru kan insan mar a, a eng lam zawnga rilru kan put thiam a pawimawh a ni” a ti.

Seminar chhimtute lawmna thuchah sawiin AICS principal, Rev. Dr. R.L. Hnuni chuan, “Heti ang ram pum huap seminar hi AICS-in vawi khat kan buatsaihna a ni a; min hawnsak tura infiamna kawng tinrenga Mizote dinhmun chawisang mektu Sports Minister Pu Zodintluanga kan nei hi kan lawmna tizualtu a ni” tiin, a hnathawhna kal zel turah a tih turte a hlenchhuah ngei theihna turin AICS hmingin Tawlhlohpuan a ban a ni.

Vawiina a hawnna inkhawm hi Rev. Dr. K. Thanzauva chuan a kaihruai a; chawhnu lamah leh naktukah hian mithiamte paper buatsaih an zirho ang. Seminar chhim tur hian AICS atanga zir chhuakte leh BD leh M Div. final year zirlaite bakah, Serampore College leh Aizawl Theological College (ATC) leh college danga professor-te an tel a. Naktuk chawhnu dar 3.00 khian Pu H.T.Sangliana, Vice-Chairman, National Commission for Minorities chuan seminar kharna thuchah a sawi ang.