Nimin chawhnuah khan Ramhlun Indoor-ah Sports Minister Pu Zodintluanga'n Catch Them Young hnuaiah Badminton Coaching a hawng a. Yonex leh Mizoram Badminton Association(MBA) thawhhona kaltlanga hmuh Badminton dress, Racquet, Racquet bag leh badminton pheikhawk te chu National Level Masters Tournament leh MBA official matches a Gold Medalist te hnenah a sem nghal.

Sports Minister Pu Zodintluanga chuan Badminton chu India rama Game thangduang tak leh Mizo te pawn kan tuipui a ni a ti a. Badminton inkhelthiam te en chuan India National Level chu International level tlukpui a ni a, National Level thleng tura North East Level Mizo shuttler ten paltlang harsa an tih thin chu nakin lawkah tuna Catch Them Young hnuaia naupang te hian an rawn thlak danglam kan beisei a ni a ti. Minister chuan khawvel a changkang zela Game pawh tharum ringawta, khelh tur a awm meuh tawh lova, eng discipline-ah pawh thluak leh kutthemthiamna leh hmangchang hriatna neih tel a ngai a, a phur apiang te tan tel a harsa tawh. Catch Them Young -Badminton coaching ah pawh naupang te chu Racquet hum dan leh khelhdan kalhmang bel taka zirtir ni hmasa se an thiambel fe hnuah inkhelhtir chauh ni se a duh thu a sawi a. Game kalhmang zirtir bel an nih hmaa naupang te inkhelhtir an nih hian naupangte tan chak duh lutuk avangin Coaching-a an zir thiamna aia mahni remhriatna hman zawk mai awlsam an chin phahin coaching pawhin an tan awmzia neilo thin a ni a ti .

Sports Minister chuan Mizoram hmun hrang hranga Catch Them Young Programme hnuaia naupang te chuan an thilzirlai ah rilru pe in an coach te thu zawm tlat se tih a chah a."In zingah mi bik, talent-neibik chu kan la chhuak dawn che u a, a hranpa in kan chawm ang che u a, a hranpa in zirtirna kan pe ang che u a.....chuvang chuan chak tum leh rilru pe tak tak lo chu kan hruaituten an thlang dawn lo che u tih in hriat a ngai a, theihtawp chhuah te tan chiah hlawhtlinna a awm thin", a ti.

Catch Them Young Coaching Programme Hawnna leh Yonex Sponsorship Semna hun hi MBA President Pu C. Zorammuana leh Vice President Pu C.Laldina ten an kaihruai a. MBA hruaitute tarlan dan chuan stadium zawng zawng an biak vek thu leh Ramhlun Indoor stadium chiah hi Aizawl khawpui chhunga Catch Them Young programme kalpui Indoor Stadium enkawltuten an remtihna sakna hmun a ni.