Lunglei-a cham mek Pu Zodintluanga, Minister, UD&PA, Sports etc. chuan Lunglei khawpui chhunga a Department enkawl hnuaia hnathawh mek thenkhat - Convention Centre, Venglai; Multi Purpose Indoor Hall, Sazaikawn leh Lena Indoor Stadium, Serkawn ami siam mek te a hmunah tlawhin Lungleia thuthar lakhawmtute bakah LDCC President C.Lalhmingliana ten an tawiawm a ni.

Convention Centre, Venglai-a mi hi UD & PA Department enkawl niin NBCC hnuaiah Trilok & Associates ten an thawk mek a, he hnathawktu hmasa Contractor chuan hna a thawh hleih theih loh avangin sorkarin a ban hnuah tuna mite hian an chhunzawm leh a ni. He Convention Centre tur hi Mizoram-a a hmasa ber tur niin, Project Cost chu cheng nuai 1877.4 a ni. Convention Centre chhungah hian thil chi hrang hrang dah a ni dawn a, Transport Deptt (MST Wing) an awm bakah chhawng chungberah Meeting Hall changkang a awm dawn bawk a. Hall hmangtuten eitur an duh pawha siam mai theihna turin Choka te dah a nih dawn bakah thawktute awmna tur Quarter pawh a awm nghal vek dawn a ni. Convention Centre a tlawhnaah Meeting Hall chhungah ban lian tak tak 4 awm chu Minister chuan tha tilovin Contractor te chu Architect-te nen lo in berawn a, thiat turin a hrilh nghal bawk. Minister chuan Mizoram State Sports Council (MSSC) atanga siam mek Multi Purpose Indoor Hall, Sazaikawn a sak mek pawh tlawhin hmalak tawh chin a en a. He Hall sakna atana estimate chu Cheng vaibelchhe 6 niin a sak hna thawk turin Lushai Engineers Company te hman an ni. Helai hmunah hian infiamna hrang hrang (Boxing, Teakwondo, Judo, Karate leh thildang) ten Training Centre atan an hmang dawn a, Mizoram-a Contact Sports zirna awmna hmasa ber tur a ni bawk.

Vawiin vek khan Minister Pu Zodintluanga chuan Serkawn, Melte rama Lena Indoor Stadium UD&PA Deptt enkawlna hnuaia NBCC, Trilok & Associates ten an thawh mek pawh a tlawh nghal a. Minister chuan helai hmunah hian Sports Stadium changkang leh lian tak dah duh a nih laiin ram neihin a tlin si loh avangin Minister hlui P.Lalbiaka chuan ama ram Sqm 8350 zeta zau Mizoram State Sports Council hnenah a pe chu a ropuiin a lawmawm hle a, Lunglei mipuite aiawhin lawmthu a sawi a ni. Pu P.Lalbiaka’n ram a pek avangin a pa hming chawiin ‘Lena Indoor Stadium’ tih anih thu pawh sawiin Minister chuan helai hmunah hian Football Field bakah Athletic track 8-lane dah a ni dawn a, Football Field-ah hian Artificial Grass phah tum a ni bawk a; Lena Indoor Stadium sakna atan hian estimate chu Cheng nuai 2418.08 a ni.

Lena Indoor Stadium sak mek chungchangah hian Serkawn YMA chuan Stadium tha tak an duh avangin Monitoring Committee an din a, he Committee hian Minister-in helai a tlawh lai hian he Stadium sak hna hi chu Contractor te hian an thawh chak thu an sawi laiin, an hmanraw hman Balu leh Rora te chuan duhthu a sam loh thu leh hetiang a nih chuan ram rotling tur hi reiloteah a chhiat leh mai an hlauh thu an lo thlen chu Minister chuan Contractor hnenah hmanraw tha zawk hmang tur leh Monitoring Committee-te nen thawkho tha tur leh inberawn zel tura chahin hnathawh dan enho zel turin a chah bawk.