1169/2024-2025

Aizawl, the 12th July, 2024: Sports & Youth Services Minister Pu Lalnghinglova Hmar chuan vawiin chawhnu dar 1:30 khan Mizoram Christian College (MCC) buatsaih zirlai thar 137 te lawmluhna leh zirlai tithate chawimawina hun 'Freshers' Social & Felicitation', Dawrpui Multipurpose Hall-a neih chu khuallian niin a hmanpui.

Khuallian Pu Lalnghinglova Hmar chuan Mizoram Christian College zirlaite result bihchianna a ngaihthlak chuan a rilru a khawih takzet thu sawiin, college naupangte ni chunga hetiang dinhmun an thleng thei leh Fresher's Day-a inringtawk taka zirlaite chetla chu ropui a tih thu a sawi a. Zirlaite chu Pathian ṭih leh taima taka lehkha zir tura fuihin, ram dang an thlen hlat poh leh anmahni aṭanga hnam dangin hriat an duh tur a nih avangin mahni subject chiah a nih loh pawhin mahni ram history, geography leh politics lamte engemawchen tal ngaihven turin a chah a. India ram Gross National Income za zela 34 (34%) chu kum 15-29 inkarte sum lakluh a nih thu tarlangin, thalai kalkhawmte chu an puitling tawh tih inhriaa ruahmanna tha neih tum turin a chah a ni.

Sports & Youth Services Minister chuan India ram pumah hun inang hman a nih avangin hmarchhaka awmte'n state dangte leh kan hnaivaia awm ram dangte aia hun kan hloh nasat thu sawiin, zirlaite chu hun vawngdik tur leh daihzai thei ang bera hman tum turin a chah a. Zir sang satliah belhchian dawl lo nih tum lo tura fuihin, zirlaibu mai bakah hriat zauna dangte pawh bih tam turin a chah a. College zawh huna kalzel dan tur ngaihven ran chunga lehkha zir tura fuihin, hlawhtlin leh hausak hi a awl lova, a kawng a thui avangin awlsam taka neih kan tum tur a ni lo a, hemi tur hian theihtawp chhuah kan tum tur a ni, a ti a. Zirlaite chu tihdan tha lo leh nunkawng hrisel lo an lo zawh palh a nih pawihin sim nan khua a tlai lo tih hriaa kalsan ngam tum turin a chah a. Thian kawm uluk tur leh hmelhriat tha, nunkawng dika hruai theitu tur thlang thiam tur leh, inrintawkna nena mite tih peih piah lam thlenga tih theih tum turin a fuih nghal bawk. 

He hunah hian Dr. Tawnenga, Principal, MCC chuan zirlai thar 137 te lawmluhna leh tawngtai sakna hun a hmang a. MCC in kum li hmel a lo hmu ve ta leh a kum tela zirlai an pung zel chu lawmawm a tih thu a sawi a. Zirlai tharte chu admission an tih laia an thuchah vawng reng tura hrilhin, thawkrim tur leh an hun vawng ṭha a, lehkha zir hunbi felfai taka insiam turin a chah a.  College-ah midangte tana ṭhianṭha ni tur leh, an nu leh pa leh zirtirtute thuawih tura fuihin, hlawhtlinna kawng ṭha ber Pathian ṭih tlat turin a fuih bawk. 

Synod Executive Secretary Rev. Dr. K Lallawmzuala, i/c MCC pawhin thu sawiin, MCC in UG result hmasa ber aṭangin result ṭha tak a nei thei chu chhuanawm tiin, hma a la sawn zel a beisei thu a sawi a. Academic session zo taa Zirtirtu leh Zirlai Library tlawh tam berte chawimawina thilpek a hlan nghal bawk. 

He hun hi Dr. Hannah Lalhlanpuii, Asst. Professor, Department of English chuan kaihruaiin Pu T. Lalremruata, Assistant Professor, Department of Political Science-in UG result hnuhnung bera MCC result tlangpui report a pe a. Tarlan a nih danin Department tin pass percentage a ṭhat thu leh University Rank holder department pathumah an neih thu a sawi a. Tunhnaia UG result chhuakah Arts stream-ah 78.85% pass-in Mizoram pumah 6-na an ni a, Commerce stream leh Management-ah 100% pass-in 1-na leh 2-na dinhmun an hauh bawk a. Heng bakah hian NEP hmang chin 2nd semester result chhuakah Arts-ah 86.15% pass-in Mizoramah pahnihna niin, Commerce-ah 60.87% pass-in pathumna an ni. 

He hunah hian MZU UG result hnuhnung bera MCC in rank holder 3 an neih, Daniel Rinmuanpuia, Topper, Public Administration, Magdalene Laltlanhlui Khiangte, 3rd position, English leh H. Lalthantluanga, 5th position, Sociology bakah department tina tiṭha berte hnenah chawimawina hlan a ni a.  Zirlai tharte aiawhin Zorinpuii leh senior aiawhin Lallianpuii Pachuau te'n thu an sawi a. Program benglut tak tak neiin hun hlimawm tak an hmang a ni. 

Mizoram Presbyterian Kohhran enkawl Mizoram Christian College (MCC) hi October ni 5, 2020 ah din niin MCC Campus, Tanhril ami peihfel a la nih loh avangin Mission Vengthlang-ah an awm mek a. Tun dinhmunah Principal bakah zirtirtu 31, non-teaching staff 8 leh zirlai 313 nei mekin Arts, Commerce leh Management-ahte subject 7 zirna an kalpui mek a ni.