No.2707/2020-2020

Aizawl, 3.7.2020: Sports and Youth Services Department chuan tunhnaia State Sports Council hnuaia work order tihchhuah chungchangah a hnuai a mi ang hian sawifiahna an chhuah:

Tunhnaiah Mizoram State Sports Council hnuaia hna chi hrang hrang thawhna atana work order tihchhuah chungchang chanchinbu thenkhatah kimchang tawk lo deuha tarlan a ni a; hemi chungchangah hian Sports & Youth Services Department chuan a hnuaia tarlan ang hian sawifiahna (clarification) a siam.

Kan hriat theuh angin, Mizoram sawrkar chuan sports sector tihhmasawnna atan theihtawpin tan a la a, Sports Policy hial siamin, infiammite hamthatna tur ruahmanna chi hrang hrang te a siam a. Tin, sports hi industry dinhmun (status)ah dahin, infrastructure chi hrang hrang dinna kawngah pawh nasa takin tan a la a ni. Hmun hrang hranga sports infrastructure dinna atan kum kalta, 2019-2020 khan Finance Department in Sports & Youth Services Department hnenah Rs 8.25 crore a pe (allocate) a; hman phalna pawh pek a ni bawk. He hnathawhna tur pawisa hi nikum (2019-2020)-a dah fel vek tawh - hmun danga hman rem tawh loh leh hemi atan chauha hman tur a nih avangin a nihna tur ang takin hman tura chhawp chhuah a ni. Hei hi hna (works) chi hrang hrang 7 thawhna atan a ni a. Hna hi Mizoram State Sports Council hnuaia thawh tur niin, hmanhmawh taka furpui lo thlen hma ngeia bul tana, hunbi tuk chhung ngeia zawh tura ruahman a ni. Chuvangin, dan leh hrai (financial rules) zawmin Restricted Tender tih chhuah a ni a, thawktu tur thlang felin work order pawh tihchhuah a ni. Hetia ram pumina Covid-19 do beihpui a thlak lai pawha sports hmasawnna atana chak taka hmalakna kalpui anih avangin sports lama mi thahnemngai te leh infiammi te hnen atangin lawmthu pawh Department-in a dawng tam hle.

A hmanna tur awm sa (works specific) a pawisa pek a nih ang ngeiin, Sports & Youth Services Department chuan, Covid-19 hripui lengin min chen chilh lai mah ni se, a hun taka hna hi thawh zawh a nih theih nan chak takin hma a la a ni. Hemi chungchangah hian kawng engkima min kaihruaitu, sports sector hmasawnna ngai pawimawh tak zet tu, Chief Minister zahawm tak leh Sports Minister zahawm tak chungah Sports & Youth Services Department chuan lawmthu a sawi tak meuh a ni.

Issued by Sports & Youth Services Department, Government of Mizoram