No.408/2020-2021

Ni 16.04.202 leh 17.04.2020 khan Aizawl East-II Bialtu MLA leh Minister Pu Robert Romawia Royte chuan a bial Aizawl East-II chhunga Veng pasarih - Chite, Armed Veng, Armed Veng South, Tuithiang, Saron, Chhinga Veng leh Dawrpui Local Task Force te an Vengah theuh kal chilhin meeting a neihpui.

Veng hrang hranga Local Task Force te hmalakna thlirhovin harsatna awm theite leh hmalak dan tur Minister hian a sawipui a. Khawvela hripui leng mek Covid-19 laka bial mipuite leh Mizoram mipuite kan him theihna tura sorkar hmalakna te sawifiahin, sorkar thuchhuahte tha taka zawm tura mipuite inzirtir zel turin Local Task Force kal khawmte a sawm a.

Veng tina Local Task Force member te leh Thalai duty thinte thawhrimna leh inpeknate chu fakin Lock Down Phase 2-ah pawh Sorkar dan siam anga chhunzawm zel turin a sawm a ni.

Veng tina LTF te chu an veng mi Mizoram pawna chhan hrang hrang avanga tangkhang an awm leh awm loh indap chhuaka mumal taka chhinchhiah tura sawmin, Sorkarin Committee a siam Task Group on Migrant Workers & Stranded Travellers te hnena submit turin a ngen a. State Sorkarin an awm mekna Sorkar hotute a biak pawh zel thu sawiin a tul dan anga tanpui dan kawng pawh a zawnpui tur thu a sawi.

Aizawl East-II chhunga LTF ten COVID-19 hrileng avanga mipui harsatna ngaihven a, kawng hrang hranga mi inpe leh sum fai thawhtu tam tak an awm avangin Minister chuan lawmthu a sawi a. Aizawl East-II Bial chhunga Ward No 8 Bialtu Pu PC Lalhmingthanga AMC Mayor leh Ward No 9 Bialtu Pi B.Lalawmpuii ten an bial an vil dan leh an tanpui thin dan chu fakawm a tih thu a tar lang bawk.

Dawrpui veng chhung bikah Civil Hospital leh mipui mamawh dawr avangin veng hrang hrang atangin mipui an pungkhawm tam a, Minister hova Dawrpui Local Task Force meeting chuan Civil Hospital-a lut leh chhuak vil uluk leh zual turin Police Force te a ngen nghal bawk a ni.

Aizawl E-II Bialtu MLA & Minister Pu Robert Romawia Royte chuan Lockdown vawi 2-na chhung atana Guidelines thar Mizoram Sorkarin a siam chu zawm vek turin a bial chhunga Local Task Force te leh mipuite a ngen a ni.

Attachment

  • Loading attachment...