Niminkhan Pi Kaphliri lo, Dihmunzawl a SRI hmanga Buh an chin chu Pu K.S. Thanga, Parliamentary Secretary hovin seng a ni.
System of Rice Intensification (SRI) hmanga buh chin hi Mizoram-ah kum 2008 atang khan tih tan a ni tawh a, hmun tlem teah enchhinna anga hmalak a ni a. Mizoram, leilet tura hmun zawl tlemnaah hian hlawk zawka buh a thar theihna a nih beiseiin uar zawka hma lak chhunzawm zel a ni ta a. Tunah hian District tinah target te siamin kalpui mek a ni.
SRI hmanga buh chin hian buh tiak ni 8 atanga ni 15-a upa phun tur a ni a, bi khatah, zai khat zelin an phun a, buh bi kar hi feet 1 te, 15 inches te a ni tlangpui. Tin, leileta buh kan china tui tam tak tlintir thin ang ni lovin lei tihnawng tawk lekin tui pawh pek tur a ni. Hetianga buh chin hian buh hung khat atangin a peng 50 atanga 100 laite pawh a insiam thei a ni. Tin, he buh chin dan thar hmang hian buh chin dan pangngai aia a let 3 te a let 6 lai te pawhin a thar hlawk thei a ni. Nimin-a Parliamentary Secretary hova buh an seng hi Hybrid Rice (KRH-II) an tih a ni a, 8th June 2011 khan a chi an kui a, 20th June 2011 khan 1 feet kar danah an phunsawn a, tichuan ni 122 hnuah seng theihin a lo awm ta a ni.
He hun hmanpuitu Pu K.S Thanga, Parliamentary Secretary, Agriculture Department chuan Buh hi kan chaw rinpui ber a nih avangin kan intodelh theihna turin sawrkarin ruahmanna siamin theih tawpin hma a la mek zel a ni tih sawiin, loneituten tun aia Buh an lo thar tam leh zual theihnan khawl hmanga leilet siam hnate thawkin, leilehna hmanrua Tractor, Power Tiller te pawh man man zawka loneitute hnena pek chhuah a nih thu leh tun sawrkar kum kal mekah pawh hian Power Tiller 200 Nos. pek chhuah leh tum a nih thu a sawi bawk.
Dr. C.Lalzarliana Director of Agriculture (Crop Husbandry) pawhin thu sawiin Pi Kaphliri leh a fate thawhrimna chu fakawm a tih thu sawiin mi taima leh tumruh chhungkua an nih ang ngeiin India rama hnathawk tha mi 101 thlanchhuah zinga an tel phak chu ropui a tih thu a sawi bawk. Chawimawina thuziak leh lehkhabu ‘Harvest of Hope’, Department of Agriculture & Co-Operation buatsaih, Union Agriculture Minister in a sem chhuah chu Pi Kaphliri hnenah Pu K.S Thanga, Parliamentary Secretary chuan he hunah hian a hlan nghal bawk a ni.
He Buh chin dan thar hmang hian tunah hian Mizoram hmun hrang hrangah Buh chin mek a ni a, him taka seng a nih chuan kumin hian kum dang aiin Buh tam zawk thar beisei a ni.
