574/2026-2027

Aizawl, the 18th May, 2026: Ni nga chhung (18.5.2026 – 22.5.2026) awh tur FOCUS 2.0 Start-Up Mission Workshop chu Conference Hall, Planning & Programme Implementation Deptt. (P&PID), Treasury Square ah vawiin khan neih tan a ni a, he workshop hmang tur hian IFAD mi leh sa bakah an consultant-te rawn kalin, FOCUS 2.0 project a thawhpui tur department leh Agency engemawzahin he workshop hawnna leh vawiin workshop hi an hmang a ni.

Pu David Lalthantluanga, IAS, Secretary, P&PID, in he workshop hi a hawng a, Pu Piyush Kanal, Country Programme Analyst, IFAD, leh Pu R. Vanrengpuia, Project Director, FOCUS 2.0, te’n kalkhawmte lawmna thu sawiin project hmachhawp an sawifiah bawk a ni.

Workshop hawnna hun hman a nih zawhah chawhma lamah Pi Girija Srinivasan, IFAD Consultant chuan project kalhmang tlangpui – project in a tum te, hmalak dan tur hrang hrang te, hmasawnna a thlen tura beisei te leh hmasawnna a thlen theih te a sawi a. Chawhnu lamah Pu Isak Lalmuanpuia Chuaungo, Joint Project Director (M&E) leh IFAD Consultant ten FOCUS chungchâng presentation pe-in hun an hmang chhunzawm a ni.

He workshop hian Ni 22.5.2026 (Zirtawpni) thleng a awh dawn a, hemi hun chhung hian IFAD leh consultant lokalte chuan project component hrang hrangah inzirtirna hun an hmang dawn a ni.

FOCUS 2.0 hmalakna turah hian department hrang hrangte nena thawhhona a pawimawh em em a. Project hi uluk taka duan niin a buatsaihna chungchangah pawh fimkhur taka ngaihtuah leh hmalaka ni a, a kalhmang leh nihphungte pawh uluk taka vawi engemaw zat ennawn leh sawiho a nih hnuah March thla khan Project Agreement tihfel a ni. Project kalpui hun chhung hi kum 6 a ni anga, District zawng zawng tuamin chhungkaw 75000 te dinhmun chawikang turin hmalakna a kalpui dawn a ni.