October ni 5-12, 2017 chhunga Ram puma hman thin ‘Right to Information (RTI) Week’ chu nimin khan Mizoram Information Commission leh Information & Public Relations Department tangkawp buatsaihin Lunglei Government College Multipurpose Hall ah hawnna inkhawm neih a ni. Pu Lalduhthlana Ralte, State Chief Information Commissioner (SCIC) chu khuallian niin Pi Lalzarmawii IAS, Deputy Commissioner Lunglei chu khualzahawm a ni. He hunah hian Mizoram Information Commission Secretary Pu Vanlalngena, MCS, Head of office te, DAA, SPIO leh SAPIO, tlawmngai pawl, zirlai hruaitute, khawtlang hruaitute, Lunglei MJA hotute, politicial party hrang hrang aiawhte leh zirlai rual thahnem tak an kalkhawm.

Pu Lalduhthlana Ralte,SCIC chuan mipuite rorelna sawrkar (Democracy) leh RTI chu thil kal kawp tlat a ni tiin Sawrkar hmalakna leh hnathawhte hriat chu khua leh tui te chanvo a ni, a ti a. RTI Act hi ramchhung state dangte aiin Mizoram ah kan la hmang tlem hle a ni tiin SCIC chuan he Dan chungchang hi mipuite zingah inhrilhfiah chhunzawm zel a tul takzet a, a tangkai tur anga mipuiten an chhawr thiam theih nan inzirtirna chak taka kalpui chhoh zel a tul a ni, a ti. Mipui kalkhawmte chu SPIO leh SAPIO te zawhna zawt hreh lo tura chahin RTI Act a nih dan tur taka tangkai taka hman theuh turin a sawm bawk.

Khualzahawm Pi Lalzarmawii IAS, Deputy Commissioner Lunglei chuan Keynote Address sawiin Lunglei District RTI Week 2017 hawnna programme ah Chief Information Commissioner leh Secretary MIC an lo tel thei chu lawmawm a tih thu a sawi a. RTI Act chu sawrkar langtlang leh mawhphurhna hlen thei awm theihna tura duan a ni tiin he Dan tha tak hmang tangkai tur leh a nih dan tur taka hmang tur chuan a hman dan tur kal hmang chiang taka kan hriat theuh a tul a ni, a ti a. RTI Act hmanga zawhna dawngtu Department te pawhin RTI Act dah pawimawhin a hun bituk chhung ngeia zawhna chhang thin turin a chah bawk.

RTI Week 2017 puala Mizoram Information Commission buatsaih RTI Slogan ziah intihsiakna lawmman dawngtu Lalrinhlua, 1st Semester, Bcom, HATIM, Lunglei zirlai hnenah Chief Information Commissioner in lawman pawisa fai Rs. 2000/- leh thuziak a hlan bawk.

Chawhnu lamah State Level Workshop on RTI ACT, 2005 neih zui nghal a ni a. He hunah hian Pu Lalduhthlana Ralte Chief Information Commissioner chuan MIC hmalakna tlangpui a tarlang a. RTI Act,2005 chu mipuiin Thuneitu (Public Authority) te atanga thil hriat theihna chanvo an neih theihna tura Sawrkarin a duan angin mipui tam zawk ten a kalhmang leh nihphung an hriat a tul a ni, a ti a. SCIC chuan RTI chu mipuiten awlsam zawka an hman theihna turin internet kaltlanga RTI zawhna sawrkar a thlenna tur MIC leh ICT Department te tangkawpin an buatsaih tih a tarlang bawk.

Pu Vanlalngena, Secretary MIC, in RTI ACT hmanga mipuiten dilna an thehluh theih dan,  SPIO/SAPIO leh DAA te mawhphurhna leh an hriattur tul te a sawifiah a, RTI ACT hmanga sawrkar thu leh hla diltheihloh thenkhat te a sawifiah bawk. Pi Mary Lalromawii, Associate Professor, Government J. Buana College, Lunglei leh District Resource Person RTI chuan ‘Right To Information leh Mipuite’ tih thupui hmangin zirtirna a pe bawk a. Hemi hnu hian zawhna leh chhanna hun leh sawihona hun hlawhtling tak hman a ni