No.869/2020-2021

Vawiin khan State Disaster Management Authority chuan an Chairman Chief Minister Pu Zoramthanga hovin CM Cabinet meeting room-ah COVID-19 hrileng do tura hmalakna te an sawiho.

Vawiin meeting ah hian Disaster Management & Rehabilitation Department hnuaia hmalaknate leh sum hman dan te an sawiho a. COVID-19 dona atan hian sawrkar laipui in ruahmanna a siam angin state SDRF (State Disaster Response Fund), 2019-2020 atangin quarantine, sample collection leh screening tihna atan 25% leh hmanrua mamawh zual (equipments) atan 10% hman a phalsak angin covid dona atana SDRF 2019-2020 sum hman theih chu 700 lakhs a ni a. Hemi atang hian a vaiin Rs. 5,35,46,448 hman tawh niin, Rs. 1,64,53,552 a la bang a ni.

Meeting-ah hian district hrang hranga quarantine facility a awm te chu a thlawn a ei tur tum sak vek a, mi pakhat tan nitin Rs. 300 bituk a nih thu te sawi niin, state pawn a tangkhang lo haw mi 1750 bawr vel tana sen tur zawng zawng chu Rs. 73,75,000 bawr vel a ni. Heng bakah hian Rapid test kit mi pakhat tan Rs. 700 zel a nih thu an sawi bawk.

Meeting hian tun hnaia ruahsur leh thlipui avanga chhiatna hrang hrang thlengte thlirho ni bawkin, puihna pek dan te an sawiho a. Fire Tender pathum neih belh tura rawtna awm chu pawm a ni bawk.

He meeting-ah hian Deputy Chief Minister Pu Tawnluia, Health Minister Dr. R. Lalthangliana, Home Minister Pu Lalchamliana, P&E Minister Pu R. Lalzirliana, EF&CC Minister Pu TJ Lalnuntluanga leh member dangte an tel a ni.