Mizoram chhunga District 6 - Aizawl, Lunglei, Serchhip, Champhai, Mamit leh Kolasib-a Village Council te leh Aizawl Municipal Council huam chhunga Local Council 83 te inthlanna chu ni 30 April, 2015 ah neih turin vawiin chawhma dar 11:00 khan Mizoram State Election Commissioner Pi L.Tochhong chuan a puang.
Village Council inthlanna tur District paruk ah hian chhungkua 1,21,983 leh Electors 3,96,601 an awm a, Village Council 536 ah Polling Booth 597 siam a ni ang. Seat awm zawng zawng 2,266 ah General ah 1,660 awmin Seat 598 chu hmeichhia tan reserved a ni. Kum 2012 Village Council inthlanah khan vote nei thei 4,06,003 an awm laiin tunah hian 3,96,601 an awm a, mi 9402-in an tlem zawk a ni. Aizawl Municipal Council hnuaia Local Council 83 inthlanna turah chhungkua 52,093, Electors 1,92,382 an awm a, Seat awm zawng zawng 535 ah General 392 awmin seat 143 chu hmeichhia tan reserved a ni. Tun tum Local Council inthlanna ah hian Local Council pual Electoral Roll neih hmasak ber hman a ni dawn a ni.
Schedule of Election chu Village Council leh Local Council te tan hetiang hian ruahman a ni :-
1. Announcement of Schedule of Election by the State Election Commission - 1.4.2015 (Nilaini)
2. Issue of Notification by the State Election Commission - 6.4.2015 (Thawhtanni)
3. Date of Issue of Notice of Election by the Returning Officers - 6.4.2015 (Thawhtanni)
4. Last date for Filing Nominations - 13.4.2015 (Thawhtanni)
5. Scrutiny of Nominations - 14.4.2015 (Thawhlehni) 11:00am-3:00pm
6. Last Date for withdrawal of Nominations - 16.4.2015 (Ningani) 12:00 noon thleng
7. Date & Time for allotment of symbols to Candidates & display of list of Candidates - 16.4.2015 (Ningani)
8. Date of Poll - 30.4.2015 (Ningani) 7:00am - 5:00pm
9. Date of re-poll if any - 1.5.2015 (Zirtawpni)
10. Counting of Votes (Vote thlak zawh fel ve leh vote chhiar tan nghal a ni ang)- 30.4.2015 (Ningani)
11. Last date for formation of Executive Body - 7.5.2015 (Ningani)
12. Date on which Election process shall be completed - 8.5 2015 (Zirtawpni)
Vote thlak turte chuan an nihna tichiang turin Election Commission of India-in an siam EPIC an keng ngei tur a ni a, EPIC nei lo chuan anmahni nihna chiang hriat theihna Identity Card dang an keng tur a ni. Vote thlak dawnin ‘vote neitu dik tak a ni’ tihchian theih a nih loh chuan vote thlak phal a ni lo vang.
Tun tum inthlanpui ah hian democracy bulthut rorelnaa hmeichhia te an tel ve ngeina turin Village Council leh Local Council tinah an tan seat zuat sakna hetiang hian siam a ni :-
Village Council ah
(1) In 200 chin hnuai lamah VC Member 3 ah hmeichhia 1
(2) In 201 - 500 awmna ah VC Member 5 ah hmeichhia 1
(3) In 501 - 1000 awmna ah VC Member 7 ah hmeichhia 2
(4) In 1001 aia tam awmna ah VC Member 9 ah hmeichhia 3
Local Council member hmun thuma thena hmun khat chu hmeichhia te tan chauh chuh theih a ni.
(1) Local Council member 5 awmna ah hmeichhia 1
(2) Local Council Member 7 awmna ah hmeichhia 2
Hmeichhia ten an tan zuat sak bak seat dang pawh an duh chuan an la chuh thei tho a ni.
Inthlanna felfai taka kalpui a nih theih nan Election Observers ruat an ni dawn a, anni hian inthlanna chungchanga hmalak dan ngun takin an vil dawn a, inthlan kalpui dana lungawilohna nei te chuan an biala Election Observer hnenah hriattir tur a ni. Vote thlak tu ten an thlakna midangin an rin hriat mai theih lohna tur te, inthlanna thianghlim leh felfai kan neih theihna turin Ballot Paper - General seat leh Reserved seat te Ballot Box pakhatah thlak vek tur a ni. Ballot Paper hi General seat tan pakhat leh Reserved seat tan pakhat a rawng inanglo hman tur a ni anga, a pahnih chuan Ballot Box pakhat ah thlak kawp tur a ni ang.
Party worker te inkara boruak tha lo pumpelh nan Polling Booth bulah Political Party te leh Candidate te awm khawm nan Common Election camp pakhat chauh siam phalsak an ni a, he Camp hi mawlmang thei ang bera siam tur a ni. Flag te, Poster te, Symbol te leh thuziak Political Party emaw candidate lam kaihhnawih ziahna engmah tar loh tur a ni. He Camp ah hian pawm tlan theih tuemaw-in a ho ang.
Kumin inthlan atang hian Village Council leh Local Council Term kum 3 ni thin chu kum 5 a ni tawh dawn a ni. Model Code of Conduct pawh hman tan nghal tur a ni a, he Model Code of Conduct hian Political Party zawng zawng, Contesting Candidate zawng zawng te, Minister te, Parliamentary Secretary te, Member of Parliament te, MLA te, Municipal Councillor te, Local Council leh Village Council inthlannaa inhnamhnawih Public Servant te a huam ang.
State Election Commissioner Pi L.Tochhong chuan khawtlang hruaitu leh roreltu te inthlanna ah vote nei zawng zawng te chu vote thlak theuh turin a sawm bawk a ni.
