State Election Commission chuan vawiin khan hriattirna tichhuakin, 23..2.2012 a Village Council inthlanna neih turah Kolasib District chhunga khaw 2 leh Aizawl District chhunga khaw 13 a inthlanna neih hun tur a sawn. He hriattirnaah hian heng khaw 15-a VC inthlan hun sawn a nih chhan chu tun hnaia Sinlung Hill Development Council (SHDC) huam chhunga political party hrang hrang hruaitute silai keng hel pawlin Dholakhal (Assam) leh Thingpuikual (Manipur) hmuna vauna hnuaia an koh khawm vang leh party bil candidate titling tura an vaukhan vang a nih thu SEC chuan a tarlang.

SEC hriattirna anga 23.2.2012 a Village Council inthlan hun sawn takna khuate chu – Kolasib District-ah : Saipum leh Saiphai te a ni a; Aizawl District-ah :0 Zokhawthiang, North Tinghmun, Mauchar, Zohmun, Palsang, Sakawrdai, Khawpuar, Vaitin, North Khawdungsei, Thingsat, New Vervek, Damdiai leh Lungsum khuate a ni. SEC chuan heng khuaa Village Council ding laite term chu 27.2.2012-a a tawp dawn avangin Lushai Hills District (Village Councils) Act, 1953, Section 5-in a sawi ang a heng VC-te hun pawhseina thupek emaw, VC thar a din hmaa inrelbawl lailawk dan tur ni 27.2.2012 chhunga siamfel turin Mizoram sawrkar chu thurawn a pe a ni.