Vawiin chhun dar 12 khan State Election Commissioner Pu C. Ropianga chuan Aizawl Municipal Council inthlan lo awm tura Observer leh Municipal Returning Officers leh Assistant Municipal Returning Officers te Briefing Meeting a ko a, he meeting-ah hian State Election Commission in Observer te chunga mawhphurhna a pek dan leh an tih leh tih loh turte sawi a ni. Election Observer-te chu anmahni ward chan chhung theuhah Election Commission mit leh beng an nih tur thu hriattir an ni a, huaisen tak leh dik tak leh thleibik nei lova hnathawk tur an nih thu tarlan a ni bawk. Election Observer-te hian Nomination thehluhna ni hnuhnung ber 11th October, 2010 (Thawhtanni) atangin an duty tan ang a. Nomination endikna leh inhnuhdawhna, campaign period, inthlan ni leh vote chhiar thlengin inthlan felfai leh muanawm kan neih theih nan an duty an kalpui dawn a ni. A bik takin Model Code of Conduct zawm chungchangah hna ngawrh takin an thawk dawn a ni.
Municipal Returning Officers leh Assistant Municipal Returning Officers te nena thawhhona tur chungchangah zawhna leh chhanna te pawh neih a ni a. State Election Commissioner chuan Aizawl Municipal Council inthlan hmasa ber felfai leh muanawm tak neih anih theihnan theihtawp chhuaha tan la theuh turin a sawm a, Election process a kal chhung chuan State Election Commission hnuaia awm an ni tih hre thar leh theuh turin a ngen a ni.
