State Employment Guarantee Council chu an Chairman Rural Development Minister Pu R. Lalzirliana kaihhruaiin vawiin khan Aijal Club Conference Hall-ah Mahatma Gandhi National Rural Employment Guarantee Scheme hnuaia ngaihtuah tur thu pawimawh hrang hrangte sawiin an thukhawm. He hunah hian Parliamentary Secretary Lt. Col. (Rtd.) Z.S. Zuala chu a tel bawk. 

Vawiin meeting-ah hian VEC thiah (dissolute) a nih thula a thuneihna te BDO/ Programme Officer emaw Advisory Committee hnena hlanchhawn dan tur kalphung te, kum 2014-a SEGC Meeting-in Material Sharing Component a lo ruahman tawh (DRDA – 40%; BDO – 40%; VEC – 20%) ennawn chungchang te leh, Mizoram MGREG Scheme 2014, section 31 hnuaia 1% labour cess lak tur tih dan awm (a taka hman loh) chu Sorkar laipui Ministry atanga 18.7.2016-a lehkha lo thlengin a rawn tihtawp avanga he inkaihhruaina siamthat chungchang te ngaihtuah a ni a. Heng bakah hian Social Audit Unit Annual Report chungchangte sawiho a ni. 

Kum 2016-2017 chhung khan MGNREGA atan sorkar laipui atanga sum hmuh chu Rs. 14451.26 lakhs niin, State Matching Share chu Rs. 349.001 lakhs a ni a. Kumin sorkar kumah hian 1st Tranche atan installment hmasa ber tur chu sorkar laipuiin April, 2017 khan Mizoram tan Rs. 13449.09 lakh a tichhuak a. Heihi May ni 8, 2017 khan district tinah semchhuah vek tawh a ni.