1746/2026-2027

Dated Aizawl, the 12th August 2026: Vawiin khan kum tina neih thin State Geological Programming Board (SGPB) meeting chu a vawi 31-na atan Secretariat Conference Hall No. 1, MINECO-ah neih a ni a. He meeting hi Commerce, Industries, Geology & Mining Department Secretary leh State Geological Programming Board (SGPB) Chairman ni bawk Dr. H. Lianzela chuan a kaihruai a ni.

He meeting-ah hian kum 2025-26 chhunga Directorate of Geology & Mining (DGM)-in Mizoram chhunga a hnathawhte thlirletna leh kum thar atana a hmachhawpte sawiho niin, Mizoram chhunga Line Department leh Agency hrang hrangte nen tang tlanga ruahmanna siam dan turte ngaihtuah a ni a. Chhiatrupna laka mipuite him zawkna turin National Highway, Major District Road leh District Road dangte awmnaa leimin awlsamna leh hlauhawm lai (weak/loose rock formations)-te zawn chhuah dan rawtna siam a nih bakah, leihnuai hausakna (natural resources) zawn kawngah te, Coal Exploration Block thar hawn dan tur leh Mizoram puma Rare Earth Elements (REE) zawnna (reconnaissance survey) kalpui zel dan turte sawiho a ni bawk.

Meeting-ah hian lung/balu leh leihnuai hausakna dan lova lak chhuah (illegal mining)-te khuahkhirhna tur leh dan anga thil kalpui a nih theihna tur ruahmanna sawiho a ni a. Mineral phurh chungchang leh uluk zawka vil a nih theihna tura Mining Check Gate siam belh rawtna bakah, dan lova leilung hausakna (lung leh balu) lak chhuah thinte dan anga kalpui vek a nih theihna turin Mizoram chhung district 11-a District Magistrate-te nen tang hova hmalak dan tur ruahmanna siam a ni bawk. Sawrkar Laipui (Central Government) inrawlhna tur ang chi a awm chuan Ministry of Mines, Ministry of Coal leh Ministry of Petroleum and Natural Gas, Government India-ahte Agenda thlen leh tura ruahmanna siam a ni.

Vawiin meeting-ah hian ruahmanna fel tak leh huapzau tak a awm theihna turin Geological Survey of India (GSI) aiawh te, district hrang hrang atanga Deputy Commissioner Office aiawh te, Disaster Management & Rehabilitation Department (DM&R), Finance Department, Land Revenue & Settlement (LR&S) Department, Border Roads Organization (BRO) te an tel a, sawm bik sorkar department hrang hrang aiawhte bakah zirna in (educational institutes leh universities) aiawh te an tel bawk.

State Geological Programming Boad (SGPB) Meeting vawi 31-naah hian an Chairman Dr. H. Lianzela’n inlawmna thu sawiin bul a tan a, hemi zawh hian Annual Report of Directorate of Geology & Mining (DGM), Mizoram during 2025-2026 leh Citizen’s Charter during 2025-2026 a tlangzarh nghal a ni.

DGM Geologist Pu V. Lalbiakmawia’n Annual Reports (2025-2026) sawifiahna hun a hmang a, SGPB Meeting vawi 30-na minute chu sawiho a nih hnuah pawm a ni. Directorate of Geology & Mining (DGM), Geological Survey of India (T-M Circle) leh SGPB member ten Action Taken Report pein, Work programme sawihawnna an nei a, chawhnu lamah Agenda hrang hrangte ngaihtuahin an sawiho bawk a ni.

Chairman Dr. H. Lianzela’n meeting khaikhawmna a neih zawhah State Geological Programming Boad (SGPB) Meeting vawi 31-na hi DGM Sr. Geologist Pu Benjamin Roluahpuia chuan lawmthu sawina hun hmangin a khar a ni.