Vawiin dar 12:00 khan Mizoram State Health Mission, National Health Mission hnuaia State Level Committee sang ber chu an Chairman Chief Minister Pu Lal Thanhawla hovin Chief Minister's Office Conference Hall-ah an thukhawm. He hunah hian Pu R Lalzirliana, Home Minister, Pu Lalsawta, Finance Minister, Pu H. Rohluna, School Education Minister, Pu P.C. Lalthanliana, Social Welfare Minister, Pu Lal Thanzara, Health Minister, Pu John Siamkunga Chairman Law Commission, Dr. K. Beichhua, MLA, Pi L Tochhong, Chief Secretary, Sawrkar mi pawimawhte bakah Mission Director leh National Health Mission ‘Secretariat’, State Programme Management Unit Officials te an tel a ni.

He hunah hian Mizorama National Health Mission in 12th Plan chhunga thil thar a tih tur te leh tih mek te, mipui ten awlsam zawka hriselna kawnga sorkar hmalakna te an hman tangkai theih dan tur te an sawiho a ni. Ministry of Health & Family Welfare-in National Health Mission hnuaia hmalak dan tur ruangam thar a rawn din chu Mizoramah pawh hman ve ngei ni se an ti a, hnathawktu daih lo leh, insem zai dan mumal tawk lo lai te pawh siam that ni se an ti a. Hriselna kawnga sorkar inrelbawlna alo felfai zawkna tura Doctor service chhunga ‘Public Health Cadre’ Central sorkarin siam tura a tih ang pawh chu tha an ti a, tun dinhmunah erawh DP&AR leh ARW ten lo zirchiang phawt se tih a ni.

He hunah hian Health Facility chi hrang hranga, thawktu indaih lo chungchang te, mamawh aia tam awm chungchang te bithliah fel dan tur chungchang pawh sawiho a ni a. Doctor indaih loh phurhrukna tura sorkar hmalakna kal mek pawh chak zawka a kal dan tur te, Medical College chungchanga hmasawnna kal mek te pawh sawiho a ni a. Sorkar chuan mipuite tana awlsam zawka Health Faciltiy te an access theih nan leh thawktu mumal taka NHM atanga dah theih ang ang te dah tum ni se an ti bawk. Chief Minister chuan he meeting hi a pawimawh avangin NHM hruaitute chu a tul ang zela hnathawh thlirhona leh thil thar sawiho tur pawimawh a awm chuan rawn hriattir leh thuai turin a hrilh nghal a ni.