Mizoram State Law Commission chuan vawiin khan Chairman Pu R.Lalrinawma office ah meeting an nei a. An thu ngaihtuah zingah Mizo Customary Law siam that chungchang, State Minority Commission din chungchang, The Mizoram Local Authorities (Prohibition of defection) Bill 2010, leh IPC-a pawngsual leh pawngsual loh chungchanga remtihna pe thei hmeichhe kum bithliah tihhniam chungchang te a tel a ni.

Mizo Customary Law chu ziak that fo chi a nih loh avangin Law Commission chuan tunlai mila dan neih mai tha a ti a. Inneih, inthen leh rokhawm chungchanga dan siam turin Law & Judicial department chu a tul anga hma la zui tura hriattir ni se, tih a ni a.

Social Welfare Department rawtna anga State Minority Commission din chungchang chu ngaihtuah ho a nih hnuin Mizorama chengte chu National Commission for Minorities Act-in minority a min puan sa avangin a hranpa a State Minority Commission din chu Law Commission chuan tul lovah a ngai a ni.

The Mizoram Local Authorities (Prohibition of defection )Bill 2010 chu he meeting ah hian rei tak sawiho a ni a.  Autonomous District Council aiawh ten joint meeting neia an sawihona leh an area chu he dan siam hian huam lo se an duh thu an tarlang a. Hemi chungchanga Sixth Scheduleed para 3 leh 12-in dan siam theihna a pek te bawhbuai lo zawnga kal an duh thu leh autonomous area huam chhunga hman tur anti defection law khauh tak an pass thu sawiin meeting resolution an lo neih chu vawiin meetingah hian pharh a ni bawk a. Ngun taka ngaihtuah hnuah Autonomous District Council area te huam lova he dan hi Elected Local Bodies te tana hman chu tha an ti a. Amaherawhchu a chhung thua 'split provision' tih chu paihin 'merger' tih chin chauh phal ni se, tiin an rel bawk a ni.

IPC-a pawngsual leh pawngsual loh chungchanga remtihna pe thei, hmeichhe kum bithliah  chungchang ngaihtuah ho a ni bawk a. Dan dinglai anga kum 16 chu Mizo khawtlang dinhmun thlirin state thenkhat te tih dan zuia tihhniam ve tawh a tha ang em tih ngaihtuah ho a nih hnuin huam zau zawka la ngaihtuah atan dah rih a ni.

Attachment

  • Loading attachment...