No.2134/2021-2022
Aizawl, 6th September, 2021 : Home Department hmalakna-in State Legislative Assembly Main building leh Annexe ah te ipkhai entlangna khawl, Baggage Scanner dah a ni ta a. Vawiin khan Pu H.Lalrinawma, Commissioner & Secretary, Mizoram Legislative Assembly in a hawng a ni.

State Legislative Assembly building te hi sawrkar hmun pawimawh, Speaker leh Dy.Speaker te office awmna hmun a ni a. Session chhungin Chief Minister leh Cabinet Minister te, MLA zawng zawng nen rorela an thutkhawmna hmun a ni a. State Legislative Assembly ah hian Assembly Committee 22 awmin heng Committee a tel MLA te hi a khat tawkin an thukhawm fo bawk a. State dang atanga rawn tlawhtu Committee te nen meeting neihna hmun leh Central lama hotu lian lo kal te pawhin meeting neihna atan an hman thin a ni a. Heng avang te hian Assembly building hi uluk taka venhim ngai hmun pawimawh a ni, tiin Pu H.Lalrinawma chuan naktuk September ni 7 a tan tur, Assembly Session a hman theih tura Home department-in hma an rawn la chu lawmawm a tih thu a sawi a ni.