Vawiin khan Tourism Minister Pu John Rotluangliana hovin a office chamber ah Thalfavang Kut, 2015 Organising Committee an thukhawm. Thurel tan hmaa thuhma sawiin Pu John Rotluangliana chuan Zoram leh a chhunga chengte kawng tam taka khawvel hriata min pho chhuak theitu chu Thalfavang Kut hi a ni, a ti a. A kum telin mipuiin Kut hi kan hlut chho zel a. Thianghlim tak leh felfai taka in tihhlim dan pawh kan thiam tawh hle a ni, a ti.

State Level Organising Committee vawiina thukhawm chuan kumin Thalfavang Kut chu 10, 11 leh 12 December, 2015 ah Tuirial Airfield ah hman leh nise an ti a. Uar leh hlim thei ang bera hmang turin mipui an sawm nghal a ni. Kum hmasaa tih tawh adventure sports chi hrang hrang te leh intihhlimna te pawh chu uar lehzuala chhunzawm nise an ti a. A hma aia changtlung zawka in ruahmanna nen Kut hlawhtling tak nei turin tun atangin tan lak nghal nise an ti a. Hot air baloon leh para-gliding te chu kum kalta a mite hlut em em anih avangin changtlung lehzuala tih a, mi tam zawk chuan theihna tura ruahman nise an ti bawk a ni.

‘Thalfavang Kut’ tih hming chu hun lo kal zelah hnam dangte tana hriatthiam awl zawk leh lam nuam zawk, mit la zawk tura hming thar phuah nise an ti a. Muang chang zawka mipui rawn chunga a hming hi la thlak turin Committee chuan thu a dah nghal bawk a ni.