Social Welfare Minister Pu P.C.Lalthanliana hovin vawiin chawhnu dar 1:00 khan New Secretariat Conference Hall ah State Level Coordination Committee for Persons with Disabilities (PwD) an thukhawm a, PwD Act hnuaia Mizoram Sorkar hmalakna leh hmachhawp mek te an thlirho.

Naupang kum 5 hnuai lam, beng ri hriatna thalo te tan sawrkar laipuia Department of Empowerment of PwD in bengdar tha chi, Cochlear implant a thlawna a tihsak theih chungchang meeting-ah hian sawi lan a ni a. Mizoram hmun hrang hranga hetiang naupang awm te hi an phone number leh address chiang taka hriattir tur leh beng ri hriatna thalo an ni ngei tih fiahna doctor lehkha an phut avangin Social Welfare Department chu a tul angin hma la se tiin an rel a. Rualbanlote tana certification camp neih tur nen a remchan dan angin kaihkawp a ni ang.

Department of Empowerment of PwD hmalakna Accessible India Campaign (Sugamya Bharat Abhiyan) chungchang sawi hovin he hmalakna kaltlang hian mipui vantlang tana hmun pawimawh bikah rualbanlote awlsam taka an lawiluh theih nan building 25 atanga 50 thleng thur chhuakin, lift emaw wheel chair hman theihna tur ramp emaw a tul dan anga siamna tur sum pek an ni ang. Rualbanlo te tana 3% hna hauhsak chungchang pawh sawiin sawrkarin hnathar lak khap rih mah se State Level Coordination Committee chuan rualbanlote tan sawrkarah hriatthiamna bik siamsak tura ngen ni se, an ti.

Meeting-ah hian Parliamentary Secretary Pu K.Lalrinthanga, ZOHANDCO Chairman Pu R.Vanlalvena MLA, Social Welfare Secretary, Lalthangpuia Sailo, PwD Commissioner Pi B.Sairengpuii leh member dangte an tel.