Vawiin chawhnu khan Transport Minister Pu John Rotluangliana leh Parliamentary Secretary, Transport Department changtu Pu T.T. Zothansanga te kaihhruaiin State Level Road Safety Council member-te chuan 15th National Road Safety Council neih tur chungchangah Transport Minister Office Chamber-ah an inhmukhawm.

New Delhi-a 15th National Road Safety Council thutkhawm turah hian state tin ten road safety chungchanga hmalakna tur ruangam an siam (action plan) presentation pek tur a ni a. National Road Safety Council hian a tum ber pakhat chu road accident vanga nunna chan zat tih tlem leh, accident thlenna bul hnaia mi (pedestrian) zinga hliam tuar (casualty) zat tih tlem te a ni a. Hemi chungchangah hian State Level Road Safety Council hnuaia department hrang hrangte chuan hmalak dan tur an rel a ni.

Vawiin meeting-ah hian Transport Minister chuan Traffic Rules hriat chian a pawimawhzia a tarlang a. Road accident ti tlem tura chuan mitin kan fimkhur tlang a ngai takzet a ni, a ti.

Road Safety atan hmalakna turah hian accident a thlen atanga darkar khat, “golden hour” an tih chhunga first-aid pek in nunna a chhan theih chungchang te, chumi kaihhnawiha first-aid pek dan inzirtir te, zirlaite hnenah road signs leh traffic rules inzirtir chungchangte leh rui chunga motor khalh chungchangte sawiho a ni.

Meeting-ah hian Transport Secretary , Health & Medical Education, PWD, School Education, Traffic hotute leh ZDU hruaitute an tel a ni.