Directorate of SCERT, Mizoram in kumtin a buatsaih thin State Level Role Play and Folk Dance Competition chu 26th September, 2019 hian SCERT Auditorium-ah neih a ni. He hunah hian District aiawha intihsiaknaa pakhatna ten inelna an nei a, heta pakhatna hian Mizoram State aiawhin December, 2019 thla tir hian New Delhi-ah National Level-a intihsiaknaah an tel ang.

He hun hawnnaa thusawitu Pi Laldawngliani Chawngthu, Director, SCERT chuan he hun hi SCERT-a thawkte chuan ni bika an ngaih thin thu leh an ngaihhlut thin ziate sawiin a tihlawhtling tura he intihsiaknaa lo tel sikul zirtirtute leh zirlaite chungah lawmthu a sawi a, Role Play leh Folk Dance chu lemchan leh hnam lam entirna mai ni lovin zirtir nei, thuchah nei tak a nih thu te a tarlang a, tun kumah pawh NCERT-in intihsiakna atana thupui a thlan chhuahte chu lawmawm a tihzia a tarlang a, an thupui thlanchhuah chu tunlai tleirawl mamawh leh mila thlan a nih thute a tarlang a, an thupui thlan chuan nun peng tinrenga hmasawnna a hawl tel thu a sawi.

Role Play-a chanchhuah tura chhawpchhuahte chu hriselna leh mihring thatna tur lam te, taksa leh rilru himna tur te, mipat hmeichhiatna laka himna lam te, internet leh media lam thil hman fimkhur tulna te leh ruihhlo laka invenna lam te a ni. Folk Dance-in tarlan chhuah a tum chu mipa leh hmeichhia intluktlanna lam te, hmeichhia a nih vang ngawta nau tih tlak that lohna te, aia upa zah tulna te, ruihhlo hmansual leh tleirawl lai huna thlemnaa luh theihna chi hrang hrang leh chona lo awm thin te a ni. Khing atang khian item pakhat ve ve intihsiak nana thlan theih a ni.

He huna thusawitu Pi Laldawngliani Chawngthu, Director, SCERT chuan mihring chu hlawhtlingin hmeltha tak pawh ni se, a taksa leh rilru a hrisel a tul a ni tih a tarlang bawk. He intihsiakna hi Life Skill hmanga chan chhuah tur a ni.

Role Play-ah Baptist HSS, Serkawn chu pakhatna niin, Folk Dance-ah chuan Govt. Chatlang H/S-te an ni a. Anni hian Mizoram ai an awh ang.