No.558/2021-2022

Aizawl, the 18th May 2021 : Vawiin chawhma khan State Level Sub-Committee On Green Mizoram chu an Chairman leh Environment, Forests & Climate Change Minister ni bawk Pu TJ Lalnuntluanga, kaihhruaina hnuaiah biakhmuhtheihna (Video conferencing) hmangin PCCF Conference Hall Tuikhuahtlang ah an thukhawm.

State Level Sub-Committee On Green Mizoram Chairman, Pu TJ Lalnuntluanga chuan Covid 19 hri leng kara meeting koh chu thil remchang ni lo mah se, thing phun chu hunbi nei a nih avang leh khawtlai chi a nih loh avang te, kan tuihna kiam zel leh sik leh sa inthlakthleng nasa avang leh, kuminah kum dang aia khawkheng kan tawrh rei avangin kangmei nasa tak a chhuak a; chungte avang chuan thing phun chu ngaihpawimawh a tul tih a sawi.

Minister chuan EF&CC Department chuan kum hmasa lam atang khan thing tiak lian tha leh hrisel tak nei turin Department chuan hma a la tih sawiin, Green Mizoram Day-a phun tur ‘tall seedlings’ a bik taka ruahman a nih thu a sawi. Minister chuan phun tam aia phun chhun apiang hlawhtling tura enkawl chhunzawm lam ngaih pawimawh a tul thu a sawi bawk. Kuminah kum dang aiin ruahtui kan hmu har a, kangmei pawh a chhuak nasa hle a, kumina kangmei chhuakah hian Forest Field staff ten kangmei thelhna kawngah theihtawp an chhuah thu sawiin, khawtlang mipuite leh NGO te nen thawhhona tha tak a neih avangin lawmthu a sawi a ni.

Nikum, kum 2020 khan Covid19 hripui avangin Green Mizoram Day hi kum dang anga hman theih a ni lo va. Aizawl District-ah chuan City Forest, Hlimen-ah EF&CC Minister hovin thing phun hnatlang neih a ni. District hrang hrang ten District Level Commiittee te ruahmannain anmahni remchan dan angin thing an phun a, mipui hnenah thing tiak an pe chhuak bawk.

Kumin 2021-ah pawh hian Covid-19 hripui chuan ziawm lam a pan theih loh avangin, Sorkar-in Covid-19 darh tur a venna kawnga inkaihruaina a siamte bawhchhe lovin, District Level Green Mizoram Committee ten anmahni District theuhvah ruahmanna siam se tiin a rel. Aizawl District-ah pawh Green Mizoram Day hi ruahmanna fel tak hnuaiah thingphun hnatlang neih ni se tiin a rel a ni.

Attachment

  • Loading attachment...