1787/2025-2026

Aizawl, 22nd August, 2025 : Vawiin khan SAD Conference Hall, MINECO-ah “State Task Force on Immunization (STFI)” thutkhawm a ni a, kumin October thla a Pulse-Polio Sub-National Immunization Day (SNID) neih tur chungchang an sawiho.

He meeting hi Dr. Lalthlengliani, Principal Director, H&FW Department leh Co-Chairman, STFI ni bawk chuan kaihruaiin member lo kalte lawmna thu leh an hmachhawp tihlawhtling tura thawh ho a tul thu a sawi a. India ram chu kum 2014 atangin zeng hri awm tawh lohna (polio-free country) rama puan ni tawh mah ila, kan thenawm ramah te zeng hri hi hmuh chhuah leh thin a nih avang leh mipui kan intlawhpawh nasat tawh em avangin, kan him tawh kan in tih rualin kan dinhmun hi a la derthawng reng a, hei vang hian SNID hi kumin October ni 14 hian neih leh tur a ni a, Mizoram pum huap ni lovin International borders nei district pali – Lunglei, Siaha, Champhai leh Lawngtlaiah neih a ni dawn tih a sawi a ni.

Pulse-Polio vaccine hi naupang kum nga chin hnuai lam pek tur a ni a, hemi atan hian inbuatsahna kalpui tawn tawh niin august ni 19, 2025 khan DIO, MO leh Data Operator te tan online training neih a ni a, September ni 5, 2025 ah District hrang hrangin micro plan an siam te endik a ni ang a, September thla chawlhkar hnihnaah Vaccinator leh Supervisor te physical training pek an ni ang a, Septembe thla chawlhkar linaah inpuahchahna thlirletna hun neih a ni ang. October ni 14-ah hmkun ruat bikah vaccine pek runpui neih a ni ang a, a hnu ni 15 & 16 hian vaccine la lote vaiin house to house activity neih a ni ang a, October ni 21,2025 ah engkim zawhfel tura ruahman a ni.

Meetingah hian vaccine pek kawngah a bik takin hmun kilkhawr leh harsa zawkah te harsatna an tawh thin dan sawiho niin a chinfel dan tur ngaihtuah a ni a, hei bakah hian MHIP, YMA, YLA, MTP, sikul zirtirtute, nursing institutions leh BSF & Assam Rifles te nena thawhho dan tur sawiho a nih bakah mipui zirtirna leh hrilhhriatna kawnga thawhho dan turte sawiho a ni.

He meetingah hian Interagency Health Emergency Kit (IEHK) WHO leh International Agency dangte tangrualin Mizoram Sawrkar hnenah an hlan bawk. He Kit in a tum ber chu Nu-in him taka nau a neih theih nan te, minor OT thianghlim taka din chawp theih nan te a ni.

He Kit hian hmanrua leh a tihthianghlimna te, vawi khat hmana paih nghal chi bungraw thianghlim te, naute leh puitling bukna te a keng tel a. Damlo enna tlanglawn – BP, Zunthlum check-na, Mit leh Beng enna hmanrua, naute leh puitling bukna leh naupang chaw khawp kham lo (malnutrition) tehna te a keng tel bawk a ni.

Interagency Health Emergency Kit hian bungraw vawi khat hman chi, tih thianghlim leh theih chi leh a tih thianghlimna hmanrua, stove nen a chhawm a. A vaiin item 54 a awm a. Mi 20000 tan thla 6 daih tura ruahman a ni.

He meetingah hian Dr Lily Chhakchhuak, Mission Director, National Health Mission, Mizoram chuan keynote address a pe a, NPSP-WHO, Aizawl Unit, Surveillance Medical Officer, Dr. Lalhlimpuii chuan report a pe bawk a ni.

Meeting-ah hian Health and Family Welfare Department, NHM Mizoram hotute leh WHO, UNICEF leh Social Welfare Department, School Education, DIPR, MHIP, LADC aiawhte an tel a ni.