Sorkar laipui ruahmanna anga Sairang thleng rel kawng siam tur chungchang thlithlaitu State Level Task Force te chu a Chairman Pu Zasanga hovin vawiin chhun khan I&PR Conference Hall-ah an thukhawm leh a, rel kawng siamna tura hmalak chin ngaihthlak leh hma chhawp bawhzui zel dan tur te an rel a ni.

Vawiin thutkhawmna ah hian Pu S.S. Kalra, Chief Engineer (Construction II) North East Frontier Railway chuan he rel kawng siam dan tur tlangpui a tarlang a leilawn leh leiverh tul zat tur te rel kawng thui zawng leh a zau zawng tur te, rail station dahna hmun turte chipchiar taka sawiin hemi atana mimal leh forest ram a paltlang tur zat hisap chhuah te a sawi a. Aizawl district leh Kolasib district huamchhung a ram a paltlang tur zat te pawh chiang taka sawiin heng mimal leh forest ram te hi railway kut ah hlan fel a nih hma chuan hna thawh tan tak tak a la harsat thu a sawi a. Heng ram mamawh te hi railway kutah hlan fel a nih hun ah chuan a tul ang a zangnadawnna pek chhuah pawh thil harsa tur a nih loh thu a sawi lang a ni. Chief Engineer chuan he rel kawng sial hna hi Railway Ministry bakah Prime Minister office atanga vil reng a nih thu leh hna thawh tawh dan thehluh reng a nih thu a sawi a, tum lawk dan chuan March, 2015 ah rel tlan tir tak tak theih beisei ani ang a ti.

Tun dinhmun ah district pahnih Kolasib leh Aizawl te chuan relkawng in a paltlang tur ram te chu enfiah a a neitute nen uluk taka teh fel mek a ni a. Ram mamawh tur zat chin fel hna runpui chu heng district 2 te hian tun thla ni 16 ral hma ngeiin lo ti fel se tiin committee chuan hunbi a tuk sak a January thla chawhma lamin ram lak tur tul bawhzui chu Mizoram sorkar ah thlen a chak taka chinfel rang tum nise a ti a. January ni 20, 2012-ah dinhmun thar lam ber ber thlir a meeting neih leh a rel nghal a ni.

Vawiin meeting ah hian MLA pahnih Pu K. Liantlinga, Pu Hmingdailova bakah member Pu R.K. Thanga, IRTS (Retd) an tel a he relkawng siamna turin a kaihhnawih sorkar department hrang hrang aiawh te an tel a ni.