State Level Training of RBSK Mobile Health Team 2nd Batch, March ni 31 atanga April ni 4, 2014 inkar chhunga neih tur chu vawiin khan Health department Conference Hall, Dinthar Aizawl-ah neih tan niin he hun hi Dr. K.Ropari, Director Health Service in a hman pui.

He Training Programme-ah hian Dr.Ropari, Director chuan kalkhawm te lawmna thu sawiin Dr. Lalthlengliani, chuan RSBK kalphung tarlanna hun a hmang a. Dr. Gordon Zohmingthanga MD, National Health Mission-in Keynote address sawiin an ni bakah hian Dr.Doris Lalnunmawii Sailo, Paedetrician, Civil Hospital, Aizawl chuan Anaemia, Iodine tlakchham vanga natna thleng thei te leh vun natna chungchang-ah kalkhawmte zirtirna a pe bawk. He training-ah hian Mobile Team ten an mawhphurhna chak lehzual a an hlen chhuah theihna tur atana tul leh pawimawh tak tak te zirho a ni.

He Training ah hian District hrang hrang atangin Mobile Health team pahnih theuh an kalkhawm a. Mobile Health Team pakhat-ah hian DMO-2, Pharmacist-2, Health Worker-2 zel an awm a ni. India sawrkar laipuiin a duan chhuah, Rashtriya Bal Swasthya Karyakram (RBSK) hi February 2013, atang khan ram pum huapa hman tan a ni a, He programme hi India ram a nausen, naupang leh tleirawl kum 19 chin hnuai lamte hriselna chawisan nan a programme a rawn duan chhuah a ni a. India ram hrang hrangah nasa taka hma lak mek niin tunah hian Central sorkar pawhin a ngai pawimawh em em a ni.

RBSK programme in a tum ber chu Child Health Screening and Early Intervention Services a ni a, hetah hian nausen, naupang leh tleirawl te hriselna endik a, harsatna an neih te a rang thei ang bera hmuhchhuah leh enkawl a ni a, tin enkawlna bik mamawh te chu he programme in a bika a din, District Early Intervention Centre a REFER te hi a nih bakah, nausen pianghlim atanga kum 19 inkar te an ni a. Heng target group te zingah hian 4Ds kan tih mai- nausen pianto fuh lo, rualban lohna leh, Vitamin tlakchhamna avanga natna thleng thei laka inven dan tur zirtirna te, rilru leh taksa hriselna kawnga naupang thanglai te chawikan te a ni.

Mizoram District tinah hian Mobile Health Team te hi Team 2 zel awmin anni hian nitin School leh Anganwadi tlawh chhuakin naupangte hriselna leh mamawh te an zirchiang thin a ni.

He Programme hi April ni 4 thlengin duanlawk a ni a. Programme kal lai ang in hun hman chhoh zel a ni ang.