Mizoram Police buatsaihin vawiin khan Arya Mess, Police Headquarters, Aizawl-ah ‘State Level Training of Trainers on Anti-Human Trafficking’ neih tan a ni a. He training 7th - 9th September, 2011 chhung awh tur hawnna inkhawm hi Pu Zosangliana, Addl. SP CID Crime in a kaihruai a, Mizoram DGP Pu Lalrokhuma Pachuau, IPS-in a hmanpui a ni.
Course Coordinator Pu Joseph Lalchhuana, SP CID Crime-in State Level Training thlirlawkna a neih hnuah Mizoram DGP Pu Lalrokhuma Pachuau chuan thu sawiin human trafficking hi Mizoramin kan hmelhriatna a la rei lutuk lova, amaherawhchu hmasawnnain a rawn ken luh thil tha lo chi hrang hrag a pung zel a, chuvangin police, prosecutor leh tlawmngai pawl te chu intuaitharna leh inzirtirna neih fo a tul a ni, a ti. Mihring hmanga sumdawn hi chaklo leh thiltithei lo zawkte sal anga man beh tlat a, nawr bettu ten an hlawkna tura dan phallo anga chhawrh luihna a ni tiin DGP chuan kum 2000-2011 chhungin Mizoramah human trafficking case 18 lai ziak luh tawh thu a sawilang a ni. Ministry of Home Affairs-in a ngaih pawimawh leh a thar thawh leh zual avangin tunah hian rampumah human trafficking chungchang training police leh a kaihhnawih pawl te tan ngawr taka beih chho mek a ni tih a tarlang bawk.
Human Trafficking hi mihring bawiha insiamna a ni a, a tuartute hi hmeichhia leh naupangte an ni ber a; ralthuam leh ruihhloa sumdawnna tih loh ah chuan khawvelah suahsualna hmanga sumdawnna lian ber pahnihna a ni. Tunlai khawvelah he sualna laka fihlim ram pakhat mah an awm lova, sualna thang chak ber a ni bawk. United Nations-in a chhut dan chuan kum tinin khawvel pumah hmeichhia leh naupang maktaduai 2 dawn lai diklo taka sumdawn nana hman leh bum chunga khawlo zawnga chhawrluih an ni a, mi maktaduai dang tam tak anmahni ram ngeia dik lo taka sumdawn nana hman an ni bawk. Human Trafficking hi ‘organised crime’ (ruahmanna nei sa hmanga pawikhawihna) a ni.
Tun hmain Mizoram Police hnuaiah hian Anti-Human Trafficking Unit (AHTU) din a ni ngai lova, hmalakna neih ang te pawh a la beitham hle a ni. Tun hnai mai atang khan Ministry of Home Affairs, GOI chuan Human Trafficking hi a ngai pawimawh leh zual avangin Mizoram Police hnuaiah pawh Anti-Human Trafficking Unit din nan cheng nuai 15.16 a rawn sanction a. Aizawl leh Lunglei District-ah te chuan Anti-Human Trafficking Unit, changtlung taka thuamin din a nih pha ta nghe nghe a ni.
Heng bakah hian Kolasib leh Champhai District-ah AHTU din phalna Central Sorkar-ah dil mek a ni a. SP CID (Crime) Office hi AHTU Nodal Office a nih angin ti changtlung turin dil a ni mek bawk. Mizoram District tinah District Nodal Officer te ruat an ni.
Kuminah pawh Sensitization Programme on Anti-Human Trafficking leh Capsule Course on Investigation of Human Trafficking Case neih a ni tawh a. Vawiina State Level Training of Trainers hi a tum khatna niin District hrang hranga training pe chhawng leh turte tana buatsaih a ni.
