Vawiin chawhma dar 10:30 khan Directorate of School Education Conference Hall-ah ni 2 awh tur State Level Workshop on Third All India Survey of Educational Administration for Mizoram State chu neih a ni.

Pu K.Lalthawmmawia, Director, School Education Department, Mizoram chuan workshop hi hawngin Department in thil tangkai tak tur Workshop an nei thei chu lawmawm a tih thu a sawi a, department than chhoh dan leh hmasawnna te, document fel fai taka vawng a, zirlaite leh mamawhtu ten an hman tangkai theih turin mahni hna te hre chiang taka thawh thiam a pawimawh thu leh sawrkar hnathawktute hian kan rilru put hmang (mind-set) hi thlak a tul a tih thu sawi langin keimahni tana thawk ni lovin ram leh mipuite tana thawk kan ni tih rilru pu chunga thawk theuh turin leh he Workshop ah hian rilru inhawng tak chunga hun hmang turin workshop a lo kal te chu a duh thu a sawi.

Hawnna inkhawm hi Pu K.Lalrintluanga, Jt. Director, School Education Department, Mizoram chuan a kaihruai a, Workshop ah hian kum 20 kal ta chhunga Education than chhoh dan leh hmalam huna chak zawk a hmasawn theih dan tur ruahmanna zir ho a ni. Hmasawnna tur a rawtna chhawp chhuah te chu Ministry of Human Resource Development (MHRD), Govt. of India ah thehluh tur a ni. Pu Lalrammawia Kawlni, SDEO, Hnahthial leh Pu R.Lalthanmawia, SDEO, Darlawn ten Workshop atana thil hriat tur tul te sawina hun an hmang bawk.

He Workshop nihnih awh turah hian Education Officer pension tawh te, zirtirtu pawl hrang hrang aiawh te, SCERT, MBSE leh DIET a mi thiam thlan chhuah te, Aizawl, Champhai leh Lawngtlai a Education Officerte leh heng district pathum a school thlan chhuah zirtirtute an tel a ni.