Vawiin khan State Medicinal Plants Board (SMPB) chu an Chairman Health Minister Pu Lalrinliana Sailo hovin a office chamber-ah an thukhawm a. Meeting-ah hian SMPB Programme Officer Dr.V.Malsawmpuii chuan Board hmalakna leh hmachhawp hrang hrang chungchang member kalkhawmte a hrilhfiah a ni.

Ministry of Health & Family Welfare, Department of AAYUSH hnuaiah hian ramhmul damdawi zirchian, tih lar leh a kaihhnawih lama hma la turin National Medicinal Plants Board NMPB) din a ni a, state tinah Board hi din a ni bawk a ni. NMPB chuan ram mipuite sunhlu thatzia leh damdawi atan hman a nih theih dan chu zau zawka hrilhhriat tumin ‘Amla Campaign’ a tan a. Mizoram-ah pawh SMPB hmalaknain sunhlu tihlar nan ‘Amla Campaign’ hi zirna in 82 laia neih a ni tawh a, sunhlu chinna hmun 1 (pakhat) enkawl mek a ni bawk a, workshop leh training pawh an buatsaih tawh nghe nghe a ni. SMPB chuan an hmalakna tur zelah Herbal Information Centre din te, ramhmul damdawi chungchang mipuite zirtir thei zawnga TV leh radio hmanga uar zawka thu puanzar te leh Mizorama ramhmul damdawi awm zawng zawng te zirchianga, uluk taka chhinchhiah te a ni.

Vawiin Board meeting neihah Health Minister chuan tuna SMPB enkawl nana sorkar laipui atangin cheng nuai 5 chauh dawn a nih thin chu a beitham deuh nia a hriat thu leh Board enkawl nana sum pun a nih theih nan SMPB chu changtlung zawka siam a, CEO hnuaiah dah tura hmalak nise tih a rawt chu Board member ten lungrual takin an pawm bawk a ni.