No.7249/2020-2021 

Champhai District mi leh sa hmun danga hnathawka eizawng, Covid-19 hrileng vanga lo haw te pualin vawiin khan Mizoram Youth Commission (MYC), Commerce & Industries department, EDC Mizoram leh Planning & Programme Implementation department tangkawp buatsaihin ni thum awh tur Entrepreneur Development Programme Training chu I&PR Auditorium, CHANEM Building-ah neih tan a ni. He hun hi Pi Maria C.T. Zuali, District Bawrhsap chuan khuallian ni a hmanpuiin training hi a hawng a ni.

Pi Maria C.T. Zuali chuan Mizo te’n lehkha zir leh sawrkar hna thawh ngawr ngawr kan suangtuah leh kan tum thin avangin mi tam takin an tih fuh loh thu a sawi a. Mahni kutkawih hmang ngeia eizawnna kan siam thiam angai tih tarlangin, mi thawhchhuahsa atanga hlawkna lo tel tum ngawt lovin mahni ngeia dingchhuak thei tura kan thiamthilte kan hman tangkai a tul a ni, a ti a.  Sawrkar hnain mi zawng zawng a daih sen loh avangin kuthnathawk chung pawhin hlawhtlinna tam tak a chan theih a ni tih kan hriat angai a ni a ti a, kuthnathawh zahpui thinte chu an dingchhuak ngai lo a ni, a ti bawk.

Champhaiah eizawnna tlak tam tak a awm thu tarlangin kan eizawnna chu engpawh lo nise, hlawhtling tur chuan thawhrimna leh taimakna bakah tih tak takna nun neih a tul thu a sawi a. Hna hote anga lang pawh thawk ila, theihtawp kan chhuah phawt chuan kan hlawhtlinpui theia, kan dinchhuahpui thei a ni, a ti. Training nei tura kalkhawmte chu thinlung leh tihtakzeta training nei tur leh a taka chhawr tangkaitu nih tum theuh tura duhsakna hlanin training hi a hawng a ni.

He hun hi Pu Lalrinawma, Functional Manager, DIC Champhai chuan kaihruaiin kum 2020 March thla atanga Covid-19 hripui lengin a tihbuai ram pawna eizawng, hna thawk chhunzawm thei lova Mizorama rawn hawte chu sawrkarin a ngaihpawimawh hle thu sawiin, anmahni kutke a dinga eizawnna kawng an zawn theihna turin Enterpreneur Development Programme Training Mizoram District 11 ah MYC, Commerce & Industries Department, EDC leh Planning & Programme Implementation Department-te tangkawpin a buatsaih thu a sawi bawk.

Resource person Pu Lalthanpuia, Associate Professor, Govt. Champhai College & Master Trainer, EDS hnen atangin eizawnna kawng an zawh zelna tura tul leh pawimawh hrang hrangte a lem nena entira ngaihthlak   a ni a. Zawhna leh chhanna hunte neih chhunzawm thin  a ni.

Kum 2020 March thla atanga hripui (Covid-19) leng avangin khawvel mihring nunphung nasa takin a buai a. Hripui leng avangin Mizoram atanga mi tak tak, ram pawna eizawngte pawhin buaina tawkin an eizawnna hna chhunzawm thei lovin Mizoram-ah an lo kir leh a. Hrilengin ziaawm lam a pan deuha, thenkhatte chu an hna chhunzawm leh tura rampawn kal leh tate awm bawk mahse, kal leh remchang lo engemawzah an awm bawk.

Ram pawna hnathawk lo kir leh (Returned Migrant Workers) te chu Sawrkar-in a ngai pawimawh em em a, anmahnia eizawnna kawng an zawn theih nan Entrepreneur Development Programme (EDP) Training chu Mizoram  district 11 ah MYC, Commerce & Industries Dept, EDC leh Planning & Programme Implementation Dept-te tangkawpin an buatsaih ta a ni.  He training hi tih tak zeta training te’n  bul an tanna tura kawng tha kawhhmuhtu ni thei tura ruahman a ni.

Planning & Programme Implementation Department chhinchhiah danin Champhai district-ah hmun danga hnathawka eizawng rawn haw Migrant Worker mi 164, Mipa 49 leh Hmeichhia 115 an awm a, mi 50 te tan training hi buatsaih a ni. Training-a telte hnenah hian T-shirts leh Training Material-te sem a ni.