3624/2022-2023
Aizawl, 17th February, 2023 : Health & Family Welfare Minister Dr. R. Lalthangliana'n Feb. 17, 2023 (Zirtawpni) chawhnu dar 1 khan MINECO-ah State Resource Centre for HIV/AIDS building thar sakna tur lungphum phumna hun a hmang. Khuallian Health Minister Dr. R. Lalthangliana chuan State Resource Centre for HIV/AIDS tiin a hming vuah mah ila anihna dik takah chuan MSACS office building tur ani tih a sawia, hun rei tak office nghet nei lova an insawnkual sek hnua hetianga hmun nghet an nei ta chu a lawmawm takmeuh a ni a ti.

Dr. R. Lalthangliana chuan khawpui tawt zelah sawrkar office hmun tur bik MNF sawrkar hmasa khan neih a tul a ni tih ngaihtuahin tuna MINECO hmun atang hian harsa takin Assam Riffles-te sawnchhuakin sawrkar office hmun tur hi a ruahman ta a, engtik niah emaw chuan Health department hnuaia thawktu hrang hrangte pawh hi helai hmunah hian an la awmkhawm theih a beisei a ni tih a sawi bawk.State Resource Centre for HIV/AIDS lungphun phumna hun hi building sakna hmun bul Aizawl Smart City Ltd. (SIPMIU) office-ah hman a ni.

Vawiin hun hmannaah hian Dr. Z. R. Thiamsanga, MLA, MSACS Steering Committee Chairman ni bawk pawhin thusawina hun hmangin Health Minister Dr. R. Lalthangliana thahnemngaihna avanga Lagislative Forum on AIDS hmalaknain MLA ten HIV atana hmalak nan sum an thawhkhawm tawh thu sawiin, Project Director leh staff tlemtein hna lian tak an thawk mek a ni a ti a, kum 20 chuang Aigupta bawih atanga chhuak kuala an input kawi hnuah Kanan raman rawn thleng ta ang mai a ni a ti.

State Resource Centre for HIV/AIDS sakna hmunna lungphumna hunah hian Chairperson Pi Esther Lal Ruatkimi, Principle Secretary, Health & Family Welfare Department chuan hetianga MSACS in office hmun nghet an nei mai tur hi Health & Family Welfare Department Minister Dr. R. Lalthangliana thahnem ngaihna ani tih sawiin Health Minister leh Health Secretary hmasa pahnih Pu R Lalengmawia leh Lalramnghaka te pahnih hnathawh a ni tel bawk a ni tih a sawi a. Hetianga MSACS in Health Department a Directorate pahnihte office hnaih taka hmun an nei tur hian hnathawh a tihchak phah ngei a beisei thu a sawi bawk.

Dr. T. Lalhmangaihi, Principal Director Health & Family Welfare Department pawhin thu sawiin kum 1998 a Firm & Society hnuaia MSACS din anih hnuah office hmun 4 ah an insawn kual hnuah MINECO a an office thar sakna tur hi kum 2020 khan remtihna tihchhuah a ni a, tuna building sakna tur hi March 16, 2022 khan tihfel a ni ta a ni tih a sawi a, he hmalaknaah buaipui leh dil tur tam tak awmte sawrkarin ngai pawimawh taka a tih hlawhtlin sak avangin lawmthu a sawi bawk.

State Resource Centre for HIV/AIDS building sakna tur technical report Er. H. Lalnghinglova, Sr. EE, Project Division-II, PWD hnen atanga ngaihthlak a ni a, project estimated cost 4 crore niin contract aggrement amount chu nuai 392.23 a ni a, a zau zawng (plinth area) hi 280.35 Sqm. a ni a, chhawng 4 a sak tura ruahman a ni a, sak phalna AMC atanga hmuh anih hnuah ni 24 January 2023 atang khan sak hna tan a ni. State Resource Centre for HIV/AIDS hi Ministry of Development of North Eastern Region (MDoNER) hnuaia North East Special Infrastructure Development Scheme (NESIDS) fund hmanga sak a ni.

MSACS Project Director Dr. Lalthlengliani chuan State Resource Centre for HIV/AIDS building sa thei tura Health & Family Welfare Department Minister Dr. R. Lalthangliana hmalakna leh a taka ti hlawhtling tura department kaihhawih leh sawrkar hotu pawimawh tak takte chungah lawmthu sawiin hun a khar a ni.